пишува КОСТА СТОИМЕНОВСКИ
Премиерот, вицепремиерот и евроинтегратор, министерот за по надвор, воената министерка, но, и многу други високи македонски функционери не запираат со лобирањето за датум за преговори со ЕУ. Од една европска престолнина до друга, од еден авион на друг, од еден луксузен хотел во друг, дома навраќаат само за да сменат долен веш! Во буџетот се уште има пари за вакви туристички патувања на нашите врвни политичари, кои ги убедуваат земјите-членки на ЕУ дека во нашата земја се е в ред, нема криминал ниту корупција, нема насилство, изборите се најрегуларни, правото функционира беспрекорно и дека РСМ ги исполнува условите за прием во ЕУ и НАТО!? Може да се очекува дека откако земјите членки на ЕУ ќе дадат согласност за почеток на преговорите ќе дојде до „тепачка“ околу тоа кој е најзаслужен за добивањето датум за преговори!
Лобирајќи по европските метрополи, нашите политичари немаат време да прочитаат, но, и доколку прочитаат, прашање е дали ќе ја разберат пораката на францускиот претседател Макрон, кој и наложил на француската дипломатија „да поработи на вградувањето на Западен Балкан во географијата на Европа“, нагласувајќи при тоа дека при „конципирањето на европската стратегија треба да се имаат на ум границите на Европа!“ (подетално за ова во написот „Макрон се токми за лидер на Европа“, објавен на ЦИВИЛ Медиа на 10 септември 2019 година).
Македонските политичари скокаат од радост откако францускиот амбасадор во Скопје Тимоние оптимистички најави дека Макрон најверојатно ќе даде согласност Македонија и Албанија да добијат термин за преговори со ЕУ!
Макрон е очигледно свесен за погрешните политики на ЕУ и САД кон Балканот и посебно кон Западен Балкан. По уривањето на Берлинскиот ѕид, Европа и САД кон балканските земји водеа политика на стабилократија, која водеше кон воспоставување на авторитарни режими и суспендирање на демократијата во овие земји! Не треба да се заборава дека Западот за фактори на мирот и стабилноста на балканскиот регион ги прогласи српскиот лидер С. Милошевиќ, потоа првиот македонски претседател К. Глигоров, но и некои други балкански лидери кои, благодарејќи на ваквата поддршка, воспоставија авторитарни режими и го реинкарнираа едноумието! Не треба да се заборава дека по фалсификуваните парламентарни и претседателски избори кои се одржаа во 1994 година, во македонскиот парламент, во периодот 1994-1998 година, не постоеше опозиција!
Во времето од клучно значење за Балканот, САД и Европа не само што немаа единствен став, ниту усогласена политика кон овој регион, туку дојде до силна манифестација на историските реминисценции на водечките западни земји кон пооделните балкански земји. Доколку западните земји не водеа селективна политика кон земјите од Балканот и доколку и ним им ги отвореа вратите за влез во ЕУ и НАТО, како што тоа го направија за земјите од централна и источна Европа, може да се претпостави дека ќе се спречеа немилите крвави војни на просторите на поранешната СФР Југославија!?
Впечаток е дека Макрон е целосно свесен за грешките во политиките на Западот кон Балканот и дека ќе се заложи за соодветни ректификации во политиките кон балканските земји, а посебно кон земјите од Западен Балкан, кои се и натаму претежок товар не само за балканскиот регион, туку и за Европа!
Преземање на содржините e ЗАБРАНЕТО (!!!), освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста. Повредата на авторските права е забранета со закон. Врз основа на договор за соработка, оваа содржина е достапна за Плусинфо и Слободен печат без ограничувања.
