По 41-ви пат по ред, косовските пратеници не успеаја да го конституираат собранието. Седницата повторно траеше само неколку минути, а нејзиниот водач, Авни Дехари, ги покани пратениците повторно да се состанат за 48 часа, во сабота, на 5 јули, пишуваат косовските медиуми.
Седницата свикана за избор на претседател на Собранието и продолжување со другите чекори од уставот не беше успешна, поради недостаток на договор меѓу политичките партии во врска со формирањето комисија за тајно гласање на кандидатката за претседател на Собранието, Албулена Хаџиу.
Веќе некое време, главните партии се спротивставуваат на предлогот на Самоопределување за избор на Хаџиу, моментално вршител на должноста министер за правда, за претседател на Собранието.
Тие го опишаа Хаџиу како необединувачка фигура и побараа од Самоопределување, како победник на изборите, да предложи друго име.
И покрај ова, Самоопределување одби да направи промена, велејќи дека предлагањето на името на претседателот е ексклузивно право на победникот на изборите.
Четири месеци по изборите на 9 февруари, Косово продолжува да функционира без нови институции, додека 30-дневниот уставен рок за конституирање на Собранието, реинтерпретиран од Уставниот суд, истекува.
Група членови на граѓански организации протестираа пред косовското Собрание, во знак на протест против политичкиот ќорсокак.
Адвокатот Арианит Коци, кој веќе неколку недели протестира пред Собранието, со себе донесе и магариња во знак на протест, што, според него, ја симболизира тврдоглавоста што ја покажуваат пратениците.
Претседателката Вјоса Османи одржа неколку состаноци со политичките лидери за да најде решение, но нејзините напори сè уште не доведоа до договор за деблокирање на процесот.
Средбата меѓу политичките лидери на 28 јуни, свикана од вршителот на должноста премиер и лидер на Самоопределување, Албин Курти, исто така не даде никакви резултати.
Правните експерти предупредуваат дека доколку Собранието не се конституира во утврдениот рок, може да се отвори патот кон уште подлабока уставна и политичка криза.
Д. Т.
