Амбасадорката на Украина, Лариса Дир, учествуваше на одбележувањето на третата годишнина од пристапувањето на Северна Македонија во НАТО, организирани на највисоко државно ниво. Во својот говор, Амбасадорката Дир упати честитки до Премиерот Димитар Ковачевски, Министерот за надворешни работи Бујар Османи, Министерката за одбрана Славјанка Петровска и до „македонскиот народ за овој судбоносен настан“.
„Со напорите на Владата и македонскиот народ, беа надминати многу пречки на патот кон демократските реформи и интегративните процеси со цел да го исполнат високите стандарди на НАТО. Камен-темелникот на Алијансата е член 5 од Северноатлантскиот договор. Колективната одбрана е сигурна гаранција за безбедност во услови на современите предизвици“, рече Дир во својот говор.
Украинската амбасадорка ги истакна напорите што ги прави Северна Македонија за да го развие капацитетот на државата во насока на колективната безбедност.
„Со пристапувањето на Република Северна Македонија во Северноатлантската алијанса, самата Северна Македонија стана посилна, а Алијансата ја зајакна својата моќ. Тоа секако дава доверба на која било земја, а исто така ги прави најефективни мерките за надминување на последиците од војната на руската федерација против Украина. Овие последици вклучуваат сајбер и хибридни закани, ранливост на критичната инфраструктура, дрски дезинформации“, рече Амбасадорката.
Таа ја истакна големата помош што Северна Македонија ѝ ја дава на Украина, особено имајќи предвид дека се работи за најмладата земја членка на НАТО. Според неа, седумте одлуки на Владата на Северна Македонија за обезбедување на воена помош за Украина се од витално значење на бојното поле за украинските бранители, кои по цена на сопствениот живот ја бранат и Украина и демократските вредности. Според нејзини зборови, обезбедувањето на Украина со дополнителни средства за противракетна и противвоздушна одбрана, оружје со долг дострел и борбени авиони ќе ги спаси животите на Украинците и ќе ја забрза победата над земјата агресор русија, што само по себе ќе го зајакне источното крило на НАТО.
„Ве молиме, не го одолговлекувајте снабдувањето со оружје за нашите војници што може да ги заштити Украинците. Секој час на бојното поле е важен“, апелира украинската амбасадорка.
Според амбасадорката Дир, со претседавањето со ОБСЕ, Северна Македонија ефективно ја извршува најтешката функција да обезбеди функционирање на овој безбедносен форум во вакви опасни услови на војната на русија против Украина.
„И преживувајќи и борејќи се во вакви услови, Украина бара безбедносни гаранции. НАТО отсекогаш ја поддржувало Украина. По 24 февруари 2022 година, ваквата поддршка и помош стана сеопфатна и оптимална. И ова ја содржи важната улога на Северна Македонија. Украина, исто така, се надева дека самитот во Вилнус ќе ги оптимизира безбедносните гаранции за Украина“, рече Амбасадорката Дир.
На крајот, украинската амбасадорка им посака на Северна Македонија и македонскиот народ сила, успех, енергија и просперитет, како член на колективното безбедно семејство – НАТО, чии врати се отворени и за Украина.
„Ви благодариме за вниманието и поддршката! Застанете со Украина“, заврши Амбасадорката на Украина, Лариса Дир.
Извор: Амбасада на Украина во Република Северна Македонија
