Лавров го злоупотреби и го пречекори времето што му беше дадено за да се обрати на Самитот, спроведувајќи ја својата агенда полна со дезинформации и руска пропаганда, без да води сметка за причината поради која му беше овозможено да присуствува во земја членка на НАТО.
Рускиот министер, очигледно исфрустриран поради тоа што неговото обраќање беше бојкотиран од дел од делегациите, кои станаа и ја напуштија конференциската сала веднаш откако претседавачот со ОБСЕ, Бујар Османи, го најави обраќањето на шефот на руската дипломатија, како и од критиките кои беа упатени кон него од останатите делегации на Самитот, се оглуши на барањата на останатите делегати да го скрати говорот и да остави простор за останатите партиципиенти да го изнесат своето излагање. Шефот на руската дипломатија, неподготвен за критиките за кои беше свесен дека следуваат, ја напушти пленарната седница веднаш по сопственото излагање.
Претставникот на Данска, кој посочи дека излагањето на рускиот претставник било со цел да предизвика заблуда и во своето излагање ја осуди руската агресија врз Украина и однесувањето на Русија во ОБСЕ, забележа дека вака изгледа дијалогот со Лавров.
Лавров остана маргинализиран на Самитот, откако претходниот ден неформалната вечера и фамилијарното фотографирање поминаа без негово присуство, а неколку високи претставници делегации, меќу кои и американскиот државен секретар Ентони Блинкен, британскиот министер за надворешни работи Дејвид Камерон, високиот претставник на ЕУ за надворешна политика и безбедност, Јосеп Борел ја напуштија земјата уште пред тој да слета во Скопје, при што јасно дадоа до знаење дека шпекулациите за можна средба со рускиот министер дефинитивно паднаа во вода.
Дека нема намера да се сретне со Лавров објави и премиерот Димитар Ковачевски, додека претходно, поради доаѓањето на Лавров, учеството на состанокот на ОБСЕ во Скопје го откажаа украинскиот министерот за надворешни работи, Дмитро Кулеба, како и шефовите на дипломатиите на балтичките земји – Естонија, Летонија и Литванија, и министерот за надворешни работи на Полска Шимон Шинковски вел Сек.
Наместо тоа, Лавров денес успеа да оствари средби со старите верни сојузници на Кремљ – Ерменија и Унгарија.
Остар протест против доаѓањето на Лавров, преку соопштение, денеска упати и ЦИВИЛ.
Драган Мишев
