Министерот за социјална политика, демографија и млади, Фатмир Лимани денеска официјално ги потпиша договорите за грант за развој на социјални услуги со девет општини, од вкупно 26 одобрени апликации, соопштија од Министерството.
Доделувањето на грантовите е во рамки на третиот јавен повик од Проектот за подобрување на социјалните услуги, кој се реализира со поддршка од Светската банка.
-На свечениот настан, министерот истакна дека овој повик е продолжение на заложбите за изградба на инклузивен и одржлив систем на социјална заштита, насочен кон потребите на граѓаните во локалните заедници, соопштија од Министерството.
Во рамки на настанот беа потпишани договори со општините: Гевгелија, Охрид, Шуто Оризари, Арачиново, Карпош, Могила, Новаци, Ресен и Старо Нагоричани за воспоставување нови социјални услуги, како што се: помош и нега во домот, дневен за стари лица со активно стареење и дневен центар за лица со попреченост со индивидуален третман.
Претходно, преку првите два јавни повика беа поддржани 34 проекти во 43 општини, со вклучување на над 460 негуватели, а над 1.600 граѓани веќе користат услуги поддржани од овој проект.
-Овие проекти не само што обезбедуваат грижа за најранливите, туку ја отвораат и можноста за економска и социјална активација на лица кои досега биле изолирани од пазарот на трудот – долгорочно невработени, корисници на гарантирана минимална помош, самохрани родители, нагласил министерот.
Проектот за подобрување на социјалните услуги е дел од системскиот процес на децентрализација и плурализација на социјалната заштита, каде општините имаат сè поцентрална улога во креирањето и спроведувањето услуги според реалните потреби на нивните граѓани.
Министерството најавува континуитет на поддршка за сите локални самоуправи и даватели на услуги кои покажуваат иницијатива и капацитет за развој на услуги што ќе обезбедат повисок квалитет на живот за граѓаните низ целата држава.
Градоначалникот на Шуто Оризари, Курто Дудуш објави на Фејсбук дека заедно со Министерот за социјална политика, демографија и млади г-динот Фатмир Лимани го потпишале договор со кој ја започнуваат имплементацијата на проектот “Грижа и нега во домот” – еден од најзначајните социјални и економски иницијативи во нашата општина.
„Овој проект е директна поддршка за најранливите членови на нашето општество – постарите граѓани и лицата со посебни потреби, кои секојдневно се соочуваат со предизвици во извршувањето на основните активности. Целта е едноставна, но моќна: да обезбедиме достоинствен живот за сите, со грижа и поддршка во нивните домови.
Овој проект е клучен пред се заради компонентата на Социјална одговорност: 30 обучени лица ќе пружат персонализирана грижа за најмалку 100 граѓани, олеснувајќи ги нивните секојдневни потреби. .Ова не е само услуга – тоа е човечност, солидарност и заедничка грижа.
– Во време кога се соочуваме со стареење на популацијата и одлив на младите, овој проект е конкретен чекор за подобрување на квалитетот на живот.
– Со грижа за постарите, ги олеснуваме семејствата и ги поттикнуваме младите да останат во Македонија, градејќи иднина тука.
Ова не е само проект на општината и на државата – тоа е наш заеднички успех. Секој од вас е дел од оваа промена, и вашата поддршка е клучна за неговиот успех.
Заеднички ќе продолжиме да градиме општество кое не ги запоставува најслабите, туку ги поттикнува најдобрите вредности во нас!“, истакна Дудуш.
фото: ФБ Курто Дудуш
