Директорот на нуклеарната централа Запорижја во Украина, кој во петокот беше приведен и уапсен од руска патрола, е ослободен, напиша денеска на Твитер шефот на Меѓународната агенција за атомска енергија (МААЕ), Рафаел Гроси. Украина ја обвини Русија за неговото апсење и го нарече терористички чин.
Украина објави дека руска патрола го уапсила Ихор Мурашов во петокот додека патувал од најголемата европска нуклеарна централа до градот Енерходар, каде живеат голем број вработени во електраната. Со објектот се уште управува украински персонал согласно условите за кои МААЕ тврди дека ја загрозуваат неговата безбедност.
Агенцијата во саботата соопшти дека контактирала со „релевантни лица од власта“, без конкретно да ја спомене Русија и била информирана дека Мурашов е „привремено приведен“.
Ја поздравувам веста за ослободувањето на Ихор Мурашов, директорот на украинската нуклеарна централа Запорижја. Добив потврда дека господинот Мурашов се вратил кај своето семејство и е безбеден, напиша Гроси денеска на Твитер.
I welcome the release of Ihor Murashov, Director General of #Ukraine’s #Zaporizhzhya Nuclear Power Plant; I have received confirmation that Mr Murashov has returned to his family safely.
— Rafael MarianoGrossi (@rafaelmgrossi) October 3, 2022
Русија и Украина меѓусебно се обвинуваат за гранатирање во кое се оштетени зградите околу електраната, а МААЕ повика на воспоставување безбедносна зона околу локацијата за да се намали ризикот од потенцијална катастрофална несреќа. Гроси оваа недела треба да отпатува во Москва и Киев, каде што ќе учествува во преговорите.
МААЕ во саботата објави дека приведувањето на Ихор Мурашов „директно и сериозно влијае на донесување одлука за гарантирање на безбедноста и заштитата на електраната“, што ги влошува постоечките безбедносни проблеми во електраната.