На конференција „Како понатаму? Реформите на јавната администрација по јунскиот Европски Совет“ што денеска се одржа во Скопје, министерот за информатичко општество и администрација, Дамјан Манчевски, изјави дека се прават големи чекори во средување на хаосот што со децении бил создаван во институциите, како и целосна деполитизација на јавниот сектор преку Законот за високо раководна служба.
„За нас ова е многу важен настан затоа што едно е да се слушне од надворешен аспект како се одвива имплементација, но навистина треба да ги слушнеме и препораките, критиките од граѓанските организации. Јас сакам да го поздравам начинот на кој што се следи имплементацијата и од граѓанските организации, нас ни е навистина битно нивното мислење со цел да обезбедиме подобра реализација на активностите и во следниот период“, рече Манчевски.
Манчевски, исто така, истакна дека министерството работи и на имплементација на Законот за општа управна постапка, додека новиот Закон за инспекциски надзор, веќе усвоен во Собрание, својата примена ќе ја има кон крајот на годината.
„Со овој закон се воведува опомена пред казна и се намалува висината на глобите, што претставува финасиско олеснувања за субјектите на надзор. Се воведува нов концепт на инспекциски надзор преку планирање врз основа на процена на ризик и унифицирано вршење на инспекцискиот надзор, со што ќе се постигне поголема правна сигурност за субјектите на надзор“, изјави Манчевски.
Конференција е по повод завршување на проектот „Набљудување на реформите во јавната администрација од страна на граѓанските организации“, проект изведен во соработка со Евротинк, Европска Унија и 12 грантисти.
