Меѓународната конференција „Сребреница – совеста на светот“, во организација на Странката на демократска акција на Македонија (СДА), ќе се одржи утре, 17 мај, во хотелот „Холидеј Ин“ во Скопје, со почеток во 12 часот.
Геноцидот во Сребреница претставува систематско масовно убиство на повеќе од 8.300 бошњачки мажи и момчиња од страна на вооружените сили на босанските Срби во јули 1995 година, за време на Босанската војна. Овој чин останува најголемото злосторство на европско тло по Втората светска војна, и е правно признаен како геноцид од страна на Меѓународниот суд на правдата и други меѓународни институции.
Во мај 2024 година, Генералното собрание на Обединетите нации усвои резолуција, спонзорирана од Германија и Руанда, со која 11 јули се прогласува за Меѓународен ден на сеќавање и комеморација на геноцидот во Сребреница.
Конференцијата ќе ја отворат претседателот на СДА – Македонија, Џелал Хоџиќ, и заменик-претседателот на Главниот одбор на СДА – БиХ, Алија Табаковиќ.
Во текот на четири панел-дискусии, ќе учествуваат бројни говорници, меѓу кои: Љубчо Георгиевски (ВМРО-НП), Енес Ибрахим (Партија за движење на Турците), Ивон Величковски (Нова Република), поранешните пратенички Санела Шкријељ и Никица Корубин, новинарот и истражувач за дезинформации од ЦИВИЛ, Дехран Муратов, претседателот на ЦИВИЛ, Џабир Дерала, геополитичкиот аналитичар од Бугарија, Владимир Владимиров, пратеници од СДА Санџак во парламентот на Србија и други.
Во посебен панел ќе се обратат преку видео-пораки европратеникот Илхан Ќучук (Бугарија), експертите за човекови права Хедер Роберсон Гастон (САД) и Кирстен Шонефелд (Германија), која е и директорка на Фондацијата „Фридрих Еберт“ за Србија и Црна Гора.
Агендата вклучува теми што се однесуваат на геноцидот, со посебен акцент на негирањето како еден од главните инструменти на великосрпската пропаганда и улогата на Руската Федерација во поддршката и проширувањето на тие наративи во регионот на Западен Балкан.
Д. Тахири
