пишува: ХУСЕИН АДЕМИ
Генијалниот американски писател, Марк Твен, во една прилика изјавил: „Човек не може да биде поискрен освен кога ќе признае дека е лажго“. Ваквата филозофија на овој извонреден ум можеби е резултат на проблемите низ кои минувал откако во една финансиска авантура загубил 300.000 долари, што е рамно на денешни 7.400.000 долари, отприлика. Убиен во поим од капитализмот во подем и кредитните долгови во кои буквално се давел, а поради кои подоцна паднал во тешка депресија, овој писател, во манир на пророк што предосетува каква ќе биде иднината на човекот, вели дека најголемата доблест на тоа јадно и себично суштество е да признае дека е навистина лажго!
Општеството во кое живеел Марк Твен денес е највлијателното во светот на економијата, политиката и воената надмоќ. Тоа е резултат на судир на идеи кој на крајот произвел држава во која за секаков вид на криминал постои одредена функционална санкција, а просперитетните таленти повеќекратно се наградуваат за да допринесат за добросостојбата на таа мулти-културна заедница.
Но, кај нас нештата никако да се мрднат од место. Интелектуалниот сталеж во земјата ни, не сите, сè уште живее во романтизмот на некакви историски идеи кои како ѓубриво насекаде ја прекриваат активната почва на национализмот и дискриминацијата. Секако, тоа го убива потенцијалот за просперитет на младата генерација која се стреми кон европските вредности. Наместо да се испрати порака за длабока и сестрана соработка меѓу сите нас во оваа истоштена држава, националниот романтизам на политиката на десната политичка опција предизвика идеолошки реуматизам кај своите подржувачи и тоа најде место во нивните електронски и печатени медиуми.
Па така, шовинистичкото дневно гласило „ВЕЧЕР“ кое инаку во континуитет шири лаги, демагогија и дезинформации, помеѓу другото и исмевајќи ја конверзацијата на немакедонецот т.е. начинот на кој тој се труди да го зборува македонскиот јазик во секојдневната комуникација со своите колеги неалбанци, нероми или нетурци на своето работно место или во секојдневното пријателско дружење. Погледнете го само насловот од 05.11.2019 година, преку кој се пресметуваат со СДСМ, односно кога градоначалникот на Скопје ја продаде Градската Куќа: „Петре го ПРОДАДЕ КУЧАТА – БУКВАЛНО!“
Јаднициве ги погодила метастаза на идиотизмот и така во еуфорија дека наскоро повторно ќе се вратат на власт, одново дрско и безобразно удираат по основните вредности на општата култура и етика прокламирани од советот на ОН дека никој никого нема право да го навредува врз основа на неговото етничко потекло и религиска определба.
Кога веќе говориме за моралот и етиката, предлог до политичко-интелектуално-верската фела: свикајте заедничка средба која ќе биде пренесувана на сите национални телевизии, а во која ќе говорите за потребата на заеднички соживот и должно почитување искажано кон поинаквиот, ослободени од теретот на национално-религиската кауза. Ајде, конечно и тоа чудо да се случи во С. Македонија, бидејќи чудни денови не очекуваат во светло на европските политички случувања. За крај, да го протолкувам Марк Твен, ако ми дозволите: Лажгото постојано глуми искреност, но, ако искрениот ја признае својата лага, тогаш и глувите и немите и слепите ќе го разберат неговиот јазик, ама проблемот е што сè уште не го разбираме јазикот на десничарите. Дај Боже и никогаш да не го разбереме.
