Премиерот на Северна Македонија, Христијан Мицкоски, во директна дебата во Атлантскиот совет во Вашингтон, изрази став сосема спротивен од оној на американскиот претседател Доналд Трамп, кој ја обвини Украина за започнување на конфликт што ја уништи нејзината земја и уби илјадници нејзини граѓани.
Запрашан да го коментира процесот на постигнување мирно решение за војната во Украина и дали тоа на некаков начин ќе има импликации за Западен Балкан, Мицкоски го даде својот одговор, кој започнува на 35:20 минути од видеото:
„Македонија е меѓу петте водечки донатори за Украина. Руската воена агресија без преседан против Украина и украинскиот народ, неиспровоцирана од ништо, е нешто страшно. Тоа мора да биде осудено. Треба да направиме сѐ што можеме за да му помогнеме на украинскиот народ и на Украина. Тоа е нашиот став. Зошто? Бидејќи Русија го оспорува и негира украинскиот идентитет и јазик. Тоа е страшно. Страшно.“
Мицкоски ја споредува позицијата на меѓународната заедница кон Украина со ставот на светот кон ситуацијата во Северна Македонија и вели:
„Но, во исто време, парламентот на една земја-членка на ЕУ го негира македонскиот идентитет и мојот мајчин јазик, македонскиот јазик, кој, патем речено, е официјален јазик на ОН од 1945 година и кодифициран од 1977 година. Затоа, треба да имаме ист пристап кон двата случаи. Да, има воена инвазија во Украина, луѓе умираат, тоа е трагично, ние им помагаме колку што можеме. Но, македонското прашање? Ајде да зборуваме за таа тема,“ рече Мицкоски.
Премиерот Христијан Мицкоски смета дека како нација сме претрпеле премногу понижувања, и сме прифатиле лоши договори во име на повисоки цели за евроатланските интеграции, а земјава се уште не е ниту на почетокот на патот за члетвство во ЕУ. Сега, вели тој, од нас се бараат повторно уставни измени, но, тоа сепак не гарантира извесност не евроинтегративниот пат.
-Кажете ми втор случај во Европа кој е барем од далеку сличен со нашиот, не зборувам за приближно сличен. Овој пат рековме, ако Pacta sunt servanda се применува за нас тогаш нека се применува за сите, ако ние испорачуваме тогаш очекуваме и другите да испорачаат, рече Мицкоски.
-Ние сега треба да ги внесеме неколку стотина наши сограѓани во уставната преамбула, што е опис на нашиот Устав. Зборуваме за бугарската заедница. Во нашиот устав ние имаме Македонци, Албанци, Срби, Турци, Бошњаци, Власи итн., па ако ги анализирате работите од таа перспектива тоа не е голема работа. Но зошто да ги внесеме во преамбулата? Можеби зборуваме за човековите права, можеби некој им ги крши човековите права на бугарската заедница? Кои сме ние политичарите да судиме дали нечии човечки права се нарушени? Има институција во Европа наречена Судот за човековите права во Стразбур која е одговорна да суди дали нечии човекови права се прекршени или не. И што вели таа институција во последните години? Тие беа јасни, 14 пати човековите права на македонската заедница во Бугарија биле прекршени, и 0 пати на бугарската заедница во Македонија. Четиринаесет наспроти нула. Како да им го појасниме ова на граѓаните, зошто го правиме ова, а не добиваме ништо. Затоа велиме бидејќи ова не е суштинско, бидејќи преговорите значат зајакнување на институции, подобрување на капацитетите на институциите, а не решавање на билатерални прашања. Ние рековме ќе го завршиме ова но кога ќе ги завршиме нашите преговори, затоа што се плашиме дека ова може да се претвори во бескрајна приказна и ќе следат нови и нови барања и никој не знае кога тоа ќе заврши, истакна премиерот Мицкоски на настанот во Вашингтон во организација на Атлантскиот совет.
А.М.
