Деновиве по медиумите се изнаслушавме за апсењата на некои симпатизери или можни сторители од редот на терористичката организација ИСИС. Апсењата се поради превентива од можни терористички напади против ова кутро и јадно парче земја во која уште тоа ни фали, некој да не фрла со бомби, не дај Боже, и така да ни ја забибери целата каша на хаос и неред од кои никако да се ослободиме уште од времето на идеолошко-политичката агресија на ДПМНЕ.
Нема да расправам за тоа кој и каде е уапсен, тоа не е моја надлежност и не е во мој домен да говорам за тоа, но, сепак останува оној црв на сомнеж: случајно да не се тргнало по стапките на вмроните кои за секоја дискутабилна ситуација измислуваа состојби на “исламски“ тероризам за да го одвратат вниманието на јавноста од нивните будалаштини и идиотизми.
Овде кај нас во чаршијата, во нашето големо село наречено Скопје, посебно од “нашата страна“ добро се знае кој какви идеи има, да не се правиме мутави, и сите знаеме кој какви глупости може да предизвика или евентуално каква добрина може да стори за заедницата. Но, тоа не значи дека знаеме и што наумил некој бисер или пак да знаеме за погубноста на неговото делување а тоа, како совесни граѓани, да не го спречиме. Ова ви го говорам од аспект на исламски теолог на кого му здодеало да слуша за некои тајни конспирации или пак да бидам сведок на блатење на мојата вера а никој да не реагира.
Кога во Македонија пред неколку години беа уапсени одредени личности кои ја фаворизираа идејата на ИСИС, сите ние почнавме да дишеме со полн капацитет бидејќи тоа зло пред се ја погаѓаше муслиманската заедница и навистина на сите ни олесни затоа што не е лесно да се носи товарот на жигосаната крава која, доколку не му припаѓа на домашното стадо, сигурно ќе биде отфрлена или … Ние муслиманите од Македонија сме против радикализмот, естремизмот и секако тероризмот и не дозволуваме тоа да се стави во контекст со исламот! Би биле будали и тешки глупандери да веруваме дека такво нешто е исправно и оправдано.
Но, чудно ми е, навистина, како деновиве на националните телевизии во емисии од отворен карактер се расправа за “исламскиот“ тероризам без присуство на компетентен исламски теолог кој на јавноста ќе и ја појасни догмата на исламот и ставот на оваа вера кон насилството, агресијата и одземањето на туѓ живот!! Ова го зборам од причина што таков едносмерен настап може кај немуслиманите да предизвика чувство на немир и вознемиреност секогаш кога пред себе ќе здогледаат маж или жена со, за неинформираните граѓани, сомнителен изглед.
Грујо и неговите крвожедни кловнови одеа и подалеку. Кога некој наш сограѓанин, муслиман, оженет со странска државјанка, одеше во МВР, отсек за странци, за да поднесат барање за државјанство врз основа на брак, беа изложувани на специјални информативни разговори кои после осум месеци резултираа со решение со кое се одбива молбата за државјанство бидејќи неговата сопруга, со кристално чисто граѓанско досие, претставува директна закана за стабилноста и безбедноста на државата!!
Ова е класичен пример за исламофобија и мизогинија т.е. омраза и предрасуда кон жената која во овој случај е муслиманка. Вакви примери кај нас има на десетици, да не кажам на стотици и никој не реагира. Ова е политика на дискриминација бидејќи не им се дозволува на муслиманите да остварат здрави и директни семејни контакти со поширокиот круг на својата фамилија. Што би се случило кога таквата жена, без никакво оправдување и докази би била протерана од Македонија, кога веќе е закана за безбедноста или пак ова претставува намерно прекинување на било какви физички контакти на муслимански семејства од различни земји во регионот? Таква заедничка политика водеа Груевски, Додик и Вучиќ. Груевски осведочен криминалец и апаш, Вучиќ пукаше од околните ридови врз невините граѓани на Сараево, а Додик го прогласува за национален херој Ратко Младиќ, Хашкиот затвореник осуден за геноцидот во Сребреница.
Се надевам дека Заев и неговата влада нема да ја повторат глупоста на ДПМНЕ туку професионално ќе си ја работат работата и навистина ќе ги штитат невините а ќе ги апсат криминалците, терористите, гомнарите и слична багра.
Јас лично се радував кога на власт дојде СДСМ бидејќи на Македонија и треба граѓанска опција а не национал-шовинистички брлози кои се нарекуваат политички партии со затскриени религиозни омрази, но, упатувам апел професионално и хумано да си ја работат работата а не да бидат бледа копи-паст варијанта на шаткастото чудовиште и неговата “шу праиш“ која тегне “цигани за уши“.
