Мисијата на Обединетите нации во Либија повика на деескалација во понеделникот по избувнувањето на борбите во главниот град на северноафриканската земја, пренесува Си-ен-ен.
Мисијата за поддршка на ОН во Либија (UNSMIL) е „алармирана од развојот на безбедносната ситуација во Триполи со интензивни борби со тешко вооружување во густо населени цивилни области“, се вели во објава на X доцна во понеделник.
„Мисијата ги повикува сите страни веднаш да престанат со борбите и да го вратат мирот и ги потсетува сите страни на нивните обврски да ги заштитат цивилите во секое време“, додаде UNSMIL.
„Нападите врз цивилите и цивилните објекти може да претставуваат воени злосторства“.
Пукање од огнено оружје се слушна во Триполи кога се појавија извештаи дека е убиен истакнатиот командант, Абдулгани Кикли од Апаратот за поддршка на силите SSA, една од најмоќните вооружени групи во главниот град, објави Ројтерс. Апаратот за поддршка на силите SSA е безбедносна институција поддржана од државата, поврзана со Претседателскиот совет, според нејзината веб-страница.
Либија е вовлечена во политички конфликт откако долгогодишниот диктатор Моамер Гадафи беше соборен во 2011 година, што доведе до појава на неколку вооружени групи.
Иако прекинот на огнот од 2020 година донесе одреден мир, земјата останува кревка и поделена, со меѓународно признатата Влада на национално единство (ГНУ) која владее во Триполи и северозапад, а Владата на национална стабилност владее во Бенгази на исток.
Повремено се пријавуваат вооружени судири, при што главните фракции се борат за контрола врз значителните резерви на нафта и гас во Либија.
Поради извештаите за насилство, Министерството за здравство на ГНУ им порача на локалните болници и медицински центри во Триполи да се подготват за вонредни ситуации, според објава на нивниот Фејсбук профил.
Министерството за внатрешни работи на ГНУ ги повика граѓаните во кратка изјава да останат дома „заради сопствена безбедност“, според Ројтерс.
Претседателството на Универзитетот во Триполи, исто така, објави на Фејсбук дека ги прекинува сите студии, испити и административна работа до понатамошно известување.
Најновата нестабилност доаѓа во време кога администрацијата на Трамп размислува за плановите за депортација на мигранти во Либија од Соединетите Американски Држави. Си-Ен-Ен првпат објави дека администрацијата комуницира со Либија за земјата да прифати мигранти од САД.
М. Д.
