Европскиот младински форум (EYF) и Млади европски федералисти (JEF) најостро ги осудуваат нападите врз граѓанското општество во Македонија, особено врз младинските организации, вклучувајќи ги и ЈЕФ Македонија. Тие порачуваат дека „силно и независно цивилно општество е апсолутно есенцијално за доброто функционирање на демократијата!“
„Во својот Извештај за состојбата на граѓанското општество во Република Македонија, Европскиот младински форум и Младите европски федералисти, пишуваат:
Во последните недели, владеачката партија ВМРО-ДПМНЕ ги засили нападите врз граѓанското општество во Македонија. ЏЕФ Македонија и ЏЕФ Европа се под директен напад, особено од таканареченото движење „Стоп Oперација Сорос“.
Неколку дена по декемвриските избори, поранешниот премиер Никола Груевски одржа говор пред Државната изборна комисија, заканувајќи им се на организациите кои примаат средства од странство, велејќи притоа дека неговата партија ќе се бори за ‘десоросоизација’. Неговата партија ВМРО-ДПМНЕ исто така издаде соопштение во кое изјави дека ‘процесот на десоросоизација започна’. Неколку дена по овие изјави, беше формирано движењето СОС, од главниот уредник на новинарската агенција МИА која е предводена од државата, Цветин Чилиманов, еден од уредниците на провладиниот медиум ‘Република’, Ненад Мирчевски и Никола Србов, колумнист во уште еден провладин медиум ‘Курир’. Ова движење, како што велат основачите, е креирано со цел да „се бори против едноумието во цивилниот сектор, кое е осмислено и предводено од Џорџ Сорос“.
Во сабота на 4-ти февруари 2017, за време на конференцијата на СОС, нејзиниот основач Чилиманов ја нарече организацијата ЏЕФ Македонија „најконтроверзната организација“, додавајќи и реченица за „смртоносните и опасните политики на Џорџ Сорос“. Понатаму, не сите презентирани податоци на пресот беа точни, а имало и манипулација со фактите.
Европскиот младински форум и ЏЕФ Европа сметаат дека силно и независно цивилно општество е апсолутно есенцијално за доброто функционирање на демократијата. Ние сме блиски партнери со организациите посветени за јакнење на независноста и активноста на организациите кои ги мониторираат активностите на владата. Јавните напади врз различни организации во Република Македонија и особено на младиниските организации, вклучувајќи ги и ЏЕФ Македонија, се загрижувачки тренд кој силно го осудуваме.
ЏЕФ Европа и ЏЕФ Македонија се борат за ослободена и обединета Европа која се води по демократски принципи и според владеењето на законот, целејќи да обезбедат мир, просперитет, безбедност и правда во Европа и во светот. Преку нивните принципи и акции, ЏЕФ Европа и ЏЕФ Македонија работат кон подлабока европска интеграција на Република Македонија која надежно ќе ја доведе земјата до статус на земја-членка на ЕУ.
Ги повикуваме властите на Република Македонија итно да престанат со оцрнувачката кампања. Владата мора да ја признае важноста на граѓанското општество и организациите за демократскиот процес и демократскиот квалитет на општеството. Ја повикуваме Европската комисија да се вклучи со Владата во решавањето на овој проблем за обезбедување на положбата на невладините организации во Република Македонија“, се вели во пораката која ја потпишуваат Кристофер Глук, претседател на ЏЕФ Европа и Луис Алварадо Мартинез, претседател на Европскиот младински форум.
