Русија е подготвена да му понуди политички азил на технолошкиот милијардер Илон Маск по неговата јавна расправија со американскиот претседател Доналд Трамп, изјави на 6 јуни Дмитриј Новиков, заменик-претседател на Комитетот за меѓународни работи на Државната дума.
„Мислам дека Маск игра сосема поинаква игра, дека нема да му треба политички азил, иако ако му требаше, Русија сигурно би можела да му го обезбеди“, изјави Новиков за државната новинска агенција ТАСС, пренесува Кијив Индипендент.
Забелешките дојдоа неколку дена откако заврши 130-дневниот мандат на Маск како шеф на привремената федерална комисија на 30 мај, и поради продлабочените тензии меѓу извршниот директор на Тесла и Трамп.
Расправијата започна кога Маск јавно го критикуваше „Големиот прекрасен закон“ на администрацијата, сеопфатен предлог за даноци за кој економистите предупредуваат дека би можел да го зголеми дефицитот на САД за 600 милијарди долари.
Трамп одговори лично напаѓајќи го Маск за време на средбата со германскиот канцелар Фридрих Мерц на 5 јуни. Во својата објава на „Трут Социјал“, Трамп рече дека Маск „едноставно полудел“.
Маск одговори на социјалните мрежи дека Трамп му ја должи својата изборна победа нему, тврдејќи дека без неговото влијание, демократите ќе ја задржат контролата врз Претставничкиот дом.
Дмитриј Медведев, заменик-претседател на Советот за безбедност на Русија и чест корисник на антизападна реторика, се пошегува на X дека Москва ќе посредува во мирот меѓу „Д и Е“ – осврнувајќи се на Трамп и Маск – во замена за акции на Старлинк.
„Не се карајте, момци“, напиша Медведев.
Маск беше клучна фигура во кампањата и раната администрација на Трамп. Како шеф на работната група за ефикасност на владата, тој ги водеше напорите за расформирање на Агенцијата на САД за меѓународен развој (УСАИД), која обезбеди над 37 милијарди долари помош за Украина.
И покрај тоа што првично ја поддржуваше Украина и обезбедуваше сателитски системи Старлинк за зајакнување на воените комуникации, Маск сè повеќе ги повторуваше руските наративи.
Милијардерот лажно тврдеше дека претседателот Володимир Зеленски има мала поддршка во Украина и го обвини Кијив дека води „бесконечна мелница за месо“.
Тој, исто така, лобираше против американската воена помош за Украина, тврдејќи дека тоа само ја продолжува војната – реплика што често ја користат претставниците на Кремљ за да ја обесхрабрат западната поддршка за Кијив.
Коментарите на Маск добија пофалби од руските претставници и пропагандисти, вклучувајќи ги и водителите на државната телевизија и воените блогери кои сега го сметаат милијардерот за симпатична фигура.
Според некои извештаи во медиумите, самиот Маск претходно зборувал со рускиот претседател Владимир Путин пред да ги каже своите идеи за разрешување на војната во Украина, кои главно се поклопуваат со барањата на Москва, го ограничуваше пристапот до неговиот сателитски интернет Старлинк за украинската војска.
Според разузнавачки извори, Маск редовно бил во контакт со Путин од крајот на 2022 година, разговорите продочжиле и наредната година кога Маск ги интензивираше критиките за американската воена поддршка на Украина.
И рускиот претседател Владимир Путин не ја крие воодушевеноста од Маск, кого на 16 април, за време на говорот на државниот технички универзитет во Москва, го пофали како врвен визионер.
М. Д.
ПРОЧИТАЈТЕ И:
