Милијардерот Илон Маск редовно бил во контакт со рускиот претседател Владимир Путин од крајот на 2022 година, се наведува во извештајот на „Вол стрит џурнал“, а пренесува „Политико“.
Според разузнавачки извори, Маск и Путин ги продолжиле разговорите и оваа година, додека Маск ги интензивираше критиките за американската воена поддршка на Украина и активно се вклучи во изборната кампања на републиканскиот кандидат и поранешен претседател Доналд Трамп.
Путин во една прилика го замолил Маск да ја избегне активацијата на неговата сателитска интернет услуга Starlink над Тајван, како услуга кон кинескиот претседател Си Џинпинг, според изјави на две лица запознаени со барањето.
Откритието за контактите на Маск со Кремљ се појави во критичен момент за американската предизборна кампања, истакнува „Политико“. Влијанието на Маск надминува политика, бидејќи преку неговата платформа Икс и технолошката компанија SpaceX, има значајни договори со владата и високопрофилно одобрение за доверливи информации во САД.
Иако Маск овозможи пристап до Starlink за Украина по почетокот на руската инвазија во февруари 2022, подоцна односите со украинските власти се заладија, па милијардерот дури ја ограничи украинската армија во користење на интернет услугата за контрола на дронови.
Во меѓувреме, портпаролот на Кремљ Дмитриј Песков изјави дека единствената комуникација меѓу Кремљ и Маск била телефонски разговор, во кој разговарале за „вселената и сегашните и идни технологии“.
Маск не одговорил на извештаите, ниту на барањето за коментар од „Вол стрит џурнал“.
