МОСТ денеска одржа прес-конференција на која ја презентираше студијата за руската пропаганда, влијание и дезинформации „Една година од руската агресија врз Украина“ работена во текот на 2022 и 2023 година. ВО студијата е опфатен период од март 2022 до февруари 2023.
„Студијата откри масовно пренесување и присуство на претставници на Кремљ во онлајн просторот во Северна Македонија, користење на медиумите под контрола на руската држава како извори во статиите, проруски пораки од политичари од регионот па и пошироко кои се руски сојузници, како и повеќе случаи на координирано масовно ширење на содржините на Фејсбук преку добро воспоставена и координирана проруска инфраструктура. Употребата на правилен јазик и фрази кога се известува за војната претставува суштинска карактеристика во спротивставувањето на пропагандата, влијанието и дезинформациите. Се чини дека голем број портали едноставно ги пренесуваат руските функционери или медиумите контролирани од Русија, и покрај тоа што тие најчесто лажат. Со ова медиумите ги поддржуваат руските напори и ги засилуваат пораките кои користат фрази и јазик што создаваат заблуди и погрешни перцепции кои придонесуваат руските наративи и пропаганда да бидат подопадливи од една страна, а публиката поподложна на истите од друга страна. Медиумите треба да бидат свесни дека зборовите се оружје во рацете на Кремљ за ширење дезинформации“, изјави Росана Алексоска од МОСТ; авторка на студијата.
Алескоска посочи дека според истражувањата се чини дека Србија со нејзиниот претседател Вучиќ е вистински руски сојузник во регионот и ги засилува руските дезинформациски наративи и манипулации со информации, при што српските провладини и проруски медиуми/портали служат како извори на такви дезинформации, кои ги преземаат од медиуми контролирани од руската држава.
Студијата е дел од програмата „Борба со лажни вести и наративи“ што МОСТ ја спроведува од 2019 година. Во рамките на студијата обработени се повеќе од 4.000 статии и повеќе од 10.000 објави на Фејсбук. Статиите се анализирани со примена на концептот 5Д преку рамката AMITT (Тактики и техники за непријателски дезинформации и влијание).
Дел од препораките на МОСТ се дека властите, политичките партии, академската заедница, приватниот сектор, медиумите и сите други засегнати страни треба да го препознаат присуството на руското малигно влијание во земјата. Откако ова ќе се направи, треба да се изработи, усвои и доследно да се имплементира долгорочен стратешки план за спротивставување на странското малигно влијание, како и долгорочен стратешки комуникациски план.
МОСТ потенцираше дека и државата треба да почне да работи на формирање на независна единица/ентитет за стратешки комуникации што ќе ги штити националните интереси и евроатлантските
интеграции и ќе се справува со предизвиците кои произлегуваат од дезинформациите и странското
малигно влијание. Ова треба да се направи во тесна соработка со стратешките сојузници на Северна Македонија, со што ќе се искористат веќе постоечките искуства и најдобри практики во НАТО и ЕУ и соодветните земји-членки.
Студијата е втемелена во научните концепти поврзани со столбовите на руските операции на влијание, концептот на „sharp power“ како и концептот на руска пропаганда кој ги опфаќа обемот, каналите на влијание, фреквенцијата на дезинформациите како и недостаток на објективност.
Повеќе: https://tinyurl.com/48ejejbk