Реформската агенда и Планот за раст претставуваат можност за трансформација на приватниот сектор во нашата земја. Вашите идеи и размислувања се клучни во овој период на трансформација. Тогаш, да работиме заедно за Реформската агенда да се преточи во вистински, одржлив раст за бизнисите во Северна Македонија, порача денеска министерот за европски прашања Орхан Муртезани.
Како што информира Министерството за европски прашања, Муртезани имаше поздравно обраќање на работилницата „Ориентација кон иднината: бизнис-можности и предизвици во рамките на Реформската агенда за Западен Балкан 2024-2027 година“.
Министерот Муртезани ги истакнал клучните придобивки и предизвици на Реформската агенда 2024-2027 за Северна Македонија за бизнис секторот. Тој посочил дека реформите, усогласени со Планот за раст на ЕУ за Западен Балкан, се клучни за поттикнување на економскиот напредок на земјата, подобрување на бизнис окружувањето, зајакнување на енергетските и дигиталните транзиции и зајакнување на владеењето на правото. Муртезани исто така ги нагласил можностите за трансформација на приватниот сектор и важноста од активно вклучување на бизнис заедницата во реформските процеси.
На работилницата присуствувале бизнис-лидери, претставници на приватниот сектор, сопственици и менаџери на мали и средни претпријатија, претставници на индустриски здруженија и други засегнати страни од приватниот сектор.
Фото: Министерство за европски прашања
