Најмалку 68 мигранти загинаа откако брод со околу 157 лица потона покрај брегот на Јемен поради лошит временски услови.
Бродот се преврте кај јужната јеменска покраина Абјан во неделата, изјави за Би-Би-Си шефот на Меѓународната организација за миграција (ИОМ) за Јемен. Тој рече дека 12 лица се спасени, но десетици се водат како исчезнати.
Се верува дека повеќето од жртвите се етиопски државјани, соопшти ИОМ.
Јемен е главна рута за мигрантите од Африканскиот рог кои патуваат кон земјите од Заливот во потрага по работа. ИОМ проценува дека стотици загинале или исчезнале во бродоломи во последните месеци.
Безбедносните претставници на Абјан изјавија дека е започната голема мисија за пребарување и спасување и дека многу тела се пронајдени низ широка област на брегот.
Шефот на ИОМ за Јемен, Абдусатор Есоев, рече дека бродот се наоѓал на опасна рута во огромната крајбрежна област што често ја користат шверцерите на луѓе.
Есоев, исто така, ја нагласи важноста од зајакнување на законските заштитни мерки за мигрантите, за да се спречи нивно експлоатирање од страна на шверцери.
Во март, два брода со повеќе од 180 мигранти потонаа покрај брегот на јеменскиот округ Дубаб поради немирно море, при што само двајца членови на екипажот беа спасени.
Мигрантите кои пристигнуваат на точките за одговор на мигранти во Јемен, исто така, пријавија дека шверцерите на луѓе стануваат понеодговорни со тоа што свесно испраќаат бродови во опасни услови за да избегнат патроли, според извештајот на ИОМ.
И покрај ризиците, многу мигранти продолжуваат да го прават патувањето, при што повеќе од 60.000 пристигнале во Јемен само во 2024 година.
Во последната деценија, Проектот за исчезнати мигранти на ИОМ регистрираше повеќе од 3.400 смртни случаи и исчезнати лица по рутата – 1.400 од тие смртни случаи се должат на давење.
Јемен останува невралгична точка зафатен од разорна граѓанска војна која трае повеќе од една деценија. Групата Хути, поддржана од Иран, контролира голем дел од северозападен Јемен од 2014 година, кога ја соборија меѓународно признатата влада од главниот град Сана.
Д. Мишев
