„Има моменти кога секоја држава доаѓа на крстосница и тоа се случува периодично. Мислам дека Македонија во моментов се наоѓа токму на една таква крстосница. Може да тргне било по еден, било по друг пат. На нас е да видиме во која насока ќе успееме да ја избуткаме државата“, вели Мирјана Најчевска, професорка и експертка по човекови права во разговор за ЦИВИЛ Медиа.
„Најлесно е да се продолжи по патот по којшто досега се одеше, а тоа е политичко решавање, политичко договарање, целосна правна нефункционалност на државата и правна несигурност. Или патот на владеење на правото, градење на една демократска држава во којашто граѓаните ќе сакаат да живеат и ќе им биде удобно да живеат. Она што јас мислам дека треба да се направи е да влеземе во период на малку поригидно владеење на правото. Луѓето се уморни. Уморни се од политички промени, уморни се од политички решенија, уморни се од политички договарања и политички влијанија. Можеби еден период на еден вид на стабилност во којшто ќе се знаат правилата и процедурите на игра во којшто луѓето ќе може да се ориентираат од денес, не за еден, не за два дена, туку за десетици години нанапред. Период во којшто ќе се знае дека законите важат не еден месец, не два месеца, туку важат со години нанапред и во којшто ќе се знае дека доколку за некого важат одредени правила, истите правила важат и за сите други. Значи тоа се моите препораки, како да се постигне тоа е веќе една друга работа. За тоа е потребна неверојатно голема свест и неверојатно голема политичка волја за којашто не сум сигурна дека во моментов ја имаме“, вели Најчевска.
Овој разговор е дел од серијата видео-изјави под заеднички наслов „Перспективи 2018“ во кој учествуваа околу 20 врвни експерти и претставници на граѓанското општество. „Перспективи 2018“ е дел од проектот „Слободни медиуми за слободно општество“, финансиран од Министерството за надворешни работи на Сојузна Република Германија.
Маја Ивановска
Камера: Атанас Петровски
Монтажа: Ермин Климента
Фотографија: Биљана Јордановска
