Колку точно држави ја признале независноста на Косово, Белград ќе утврдува преку голема дипломатска акција во следните месеци, информира весникот „Новости”.
Постои сомнеж дека листата на држави кои го признале Косово, соопштена од властите во Приштина, не е веродостојна, и затоа Србија одлучи да ја провери ситуацијата на теренот, наведува српскиот медиум.
Дека се подготвува сериозна акција со која ќе се стави крај на шпекулациите колку држави го признале Косово, за „Новости“ потврди и министерот за надворешни работи Ивица Дачиќ, кој истакна дека на списокот на Приштина од 114 земји, има најмалку седум од нив кои никогаш не го признале Косово.
Србија во претходните години, од официјалните претставници на неколку земји доби уверување дека не бил повлечен таков потег. Последната земја, која, според министерот за надворешни работи на Косово Беџет Пацоли, минатиот викенд испрати „вербална нота” за признавање е Мадагаскар, па и тој случај ќе биде проверен.
[divide]
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
