Министерот за животна средина и просторно планирање Насер Нуредини, на покана и во организација на Енергетската заедница, денеска во Брисел, учествуваше како панелист на настанот на високо ниво на Прекуграничниот механизам за прилагодување на јаглеродот (ЦБАМ), кој е во завршна фаза на усвојување од страна на Европскиот парламент, пренесува МИА.
На настанот, високи претставници на Енергетската заедница разменија мислења за функционалноста на ЦБАМ и перцепциите дали тој може да биде клин на раздор или е катализатор на Енергетската заедница.
Како што соопшти Министерството за животна средина и просторно планирање, во своето обраќање, министерот Нуредини се осврна на тековните активности на национално ниво во делот на климатската акција и националните определби за зелена транзиција на економијата, како и постигнување на целите за декарбонизација на производствените процеси. При тоа тој истакна дека земјава сака да биде дел од решението и остварувајќи ги амбициозните климатски цели до 2050 година да постигне јаглеродна неутралност.
Но, исто така укажа и дека како држава кандидатка за членство во ЕУ сме исправени пред предизвик за прилагодување националното законодавство со тоа на Унијата, кое е динамично, и тоа не само од легислативен, туку и од административен и технички аспект, дека сме во фаза на креирање на предлогот за јаглеродно таксирање, но сме соочени со уште поголемиот предизвик, а тоа е праведната транзиција на економијата.
Од таа причина, потенцирал Нуредини, од клучно значење ќе биде континуираната поддршка од страна на ЕУ и од финансиски и од технички/експертски аспект.
