Опозициските партии – вклучувајќи ги ПДК, ЛДК, ААК, Нисма и Српска Листа – одбија да номинираат членови за комисијата што ќе го организира тајното гласање за претседател на собранието, сметајќи го овој процес некомпатибилен со Уставот, така што ниту денеска пратениците не успеаја да конституираат собрание во косово, пренесоа косовските медиуми.
Една од главните теми Косово по неуспевањето конститурирање на собранието, е изградбата на два моста врз реката Ибар во Митровица. Откако веќе се фрлени темелите, денеска од Српска листа покренаа петиција против изградбата на мостовите, пишуваат косовските медиуми.
Во продолжение се поместени содржините од денешниот редакциски избор на ЦивилМедиа, од албанските медиуми во регионот.
КОСОВО
Панорама: Не успеа ниту 43-тиот обид за конституирање на косовското собрание опозицијата одби да предложи членови на Комисијата што ќе го организира тајното гласање за претседател на парламентот
Како и во минатото, опозициските партии – вклучувајќи ги ПДК, ЛДК, ААК, Нисма и Листа Српска – одбија да номинираат членови за комисијата што ќе го организира тајното гласање за претседател на собранието, сметајќи го овој процес некомпатибилен со Уставот.
На отворено гласање, тие постојано се спротивставуваа на назначувањето на Албулена Хаџиу од движењето Самоопределување на оваа позиција.
Ветевендосје, кое освои мнозинство гласови на парламентарните избори во февруари, инсистира дека тајното гласање е легитимно и сака да продолжи понатаму.
Пратениците од ПДК, ЛДК и ААК излегоа на говорницата за да ја повикаат Ветевендосје да го прекине она што го нарекоа „политички циркус“ – што го натера претседателката да побара нивниот говор да биде прекинат, пренесе Панорама.
Косова прес: Фрлени темелите на два моста врз реката Ибар во Миторвица, Курти вели дека заврши времето на барикадите
Поставен е камен-темелникот на два нови моста преку реката Ибар, вредни приближно три милиони евра. Вршителот на должноста премиер Албин Курти не потврди дали се координирале со Европската Унија во врска со изградбата, велејќи дека работат според законот и во корист на граѓаните, нагласувајќи дека и главниот мост ќе биде отворен.
На церемонијата на поставување на камен-темелникот присуствуваа вршителот на должноста премиер Албин Курти, заедно со градоначалникот на општина Северна Митровица, Ерден Атиќ, заменик-градоначалникот на општина Јужна Митровица, Аријан Тахири, вршителот на должноста министер за локална самоуправа, Елберт Красниќи и вршителот на должноста министер за животна средина, просторно планирање и инфраструктура, Либурн Алиу, пренесе Косова прес.
Вршителот на должноста премиер Албин Курти објави дека мостот во близина на општина Северна Митровица ќе биде наменет за возила и пешаци, додека другиот на југ ќе функционира само за пешаци.
РСЕ: Српска листа покрена петиција против изградбата на двата моста на Ибар
На иницијатива на Српска листа, најголемата српска партија на Косово, која ја ужива поддршката на Белград, во Северна Митровица денеска е покрената петиција против изградбата на мостови преку реката Ибар.
Претседателот на Српската листа, Златан Елек, пред почетокот на потпишувањето на петицијата изјави за Радио Телевизија Србија дека целта е „да се покаже единствен став на српскиот народ, дека не прифаќа еднострани одлуки за проекти на штета на српската заедница“.
Тој рече дека петицијата ќе биде достапна за потпишување во следните два дена, а потоа ќе биде доставена до меѓународната заедница.
Европската унија претходно изјави за Радио Слободна Европа дека секоја одлука за изградба на инфраструктура по должината на реката Ибар мора да се донесе внимателно и на инклузивен начин – односно со целосно вклучување на сите засегнати заедници.
Инфокус: Барањето на Тачи за одвојување на постапката во случајот против спроведувањето на правдата е одбиено
Специјализираните совети на Косово (KSCC) во Хаг донесоа одлука со која го отфрлија барањето на поранешниот претседател Хашим Тачи за одвојување на постапката против него во случајот против спроведувањето на правдата.
Одлуката е донесена на 30 јуни 2025 година, по барање на Тачи, судењето само против него да се одложи до завршување на случајот во кој тој е обвинет заедно со Кадри Весели, Реџеп Селими и Јакуп Красниќи за воени злосторства, објавува „Заклетва за правда“, пренесе Инфокуси.
Во одлуката, судијката на претходна постапка, Марџори Маселот, утврди дека аргументите на одбраната на Тачи се неосновани во врска со ова прашање и случајот за воени злосторства.
АЛБАНИЈА
Балкан веб: Министрите за надворешни работи на Албанија и Грција се сретнаа во Корча, во фокусот на средбата е зајакнувањето на односите и европската интеграција
Во Корча се одржа важна средба меѓу албанскиот министер за надворешни работи, Игли Хасани, и неговиот грчки колега, Јоргос Герапетритис. Церемонијата се одржа по повод инаугурацијата на новата зграда на грчкиот генерален конзулат во градот.
Новата зграда на конзулатот се смета за мост на комуникација за граѓаните. Фокусот беше ставен на коегзистенцијата, развојот на образованието и дигитализацијата на услугите. На средбата во Корча беше потврдена посветеноста на продлабочувањето на билатералните односи, пренесе Балканвеб.
КОЛУМНА
Коха: „И по 30 години Сребреница е сè уште е на совеста на Европа“
„Не е доволно што на секоја годишнина од геноцидот во Сребреница, ЕУ повикува на „не смее да се негира геноцидот“ и вели дека „нема место во Европа за негирање на геноцидот и препишување на историјата“. Додека ЕУ ги поддржува, ги нарекува „партнери“ и „пријатели“ оние кои јавно го негираат геноцидот во Сребреница, тврдењата од Брисел дека „нема место во Европа за негирање на геноцидот“ звучат многу лицемерно.“, пишува Авторот Аугустин Палокај, во колумната „И по 30 години Сребреница е сè уште е на совеста на Европа“, објавена во косовскиот дневен весник Коха.
Подготви: Д. Тахири
