Иницијативата „Обединети во различноста“ на ЦИВИЛ влегува во завршната фаза од промотивните онлајн активности. Со оваа Иницијатива, ЦИВИЛ само уште еднаш ја нагласува цврстата определба на Организацијата да ги застапува и промовира човековите права и слободи, мултикултурата и европските вредности во македонското општество. Иницијативата започна кон средината на октомври, а по завршувањето на промотивните активности, Организацијата ќе продолжи со својата вообичаена динамика.
Бројни активисти, уметници, интелектуалци и јавни личности пишуваат, дизајнираат и говорат за различностите, мултикултурното општество и европските вредности. Преку 60 медиумски содржини веќе до сега се објавени, а се очекува да се објават уште најмалку 30 во наредните две недели.
Организацијата ги повикува ги вклучува сите што сакаат да споделат свое сопствено искуство, став или порака за тоа како луѓето можат да бидат обединети во различноста. Тоа може да се направи и преку селфи видео, но и преку закажување термин за снимање на отворено со екипата на ЦИВИЛ. Тимот на ЦИВИЛ им стои на располагање на сите заинтересирани, секој работен ден од 9 до 17 часот.
Сите содржини поврзани со оваа иницијатива се објавуваат во рубриката Мултикултура на интернет порталот ЦИВИЛ МЕДИА, како и на другите портали на медиумската платформа на ЦИВИЛ. Сите содржини објавени во оваа рубрика се достапни за објавување, со неопходната атрибуција, согласно со лиценцата Creative Commons 4.0.
Секој ден има нови содржини, а секако, гласот на граѓанките и граѓаните, особено нивните претставници од граѓанското општество, се редовно застапени во бројните објави на медиумската платформа, како и на профилите на Организацијата на социјалните мрежи.
Македонското општество е мултикултурно, мултиконфесионално и мултиетничко. Овој факт на реалноста ги претставува и убавината и големите потенцијали на земјата. И со овој проект, ЦИВИЛ испраќа силна порака против национализмот и ги повикува граѓанките и граѓаните да продолжат со поддршката на иднината на Северна Македонија во ЕУ.
Пораката е да бидеме ,,Обединети во различноста”. Да работиме за мир и просперитет и истовремено да го осознаеме богатството што произлегува од нашите различни култури, традиции и јазици.
Хаштаг на Иницијативата е #ОбединетиВоРазличноста, #TëBashkuarNëDallime или #UnitedInDiversity, а се разбира и на сите други јазици кои се говорат во Северна Македонија и во светот. Иницијативата ја води ЦИВИЛ, со поддршка од Министерството за надворешни и европски прашања на Големото Војводство Луксембург.
ЦИВИЛ Тим за комуникации 
