На денешен ден, во 1908 година во Битола заврши Битолскиот Конгрес на кој се создаде албанската стандардизирана азбука.
На Конгресот се решава азбуката да се состои од 36 латински букви, што е во употреба до ден денес. За потребите на печатење на книги и весници со албанска азбука, во Битола тогаш се отворила и првата печатница, позната како Битолска Печатница, финансирана од група трговци – Албанци муслимани.
Зградата во која се одржал Битолскиот Конгрес, денес е Музеј на албанската азбука во кој се поставени фотографии и повеќе од 230 документи во дигитална и хартиена форма со кои се афирмираат преродбеничките, културолошките и напредните движења на албанскиот народ.
„Прославувајќи го овој празник, ние како современо, мултиетничко и мултикултурно општество, ги потврдуваме нашите заложби за градење на едно општество за сите и подобра и посветла иднина за секој наш граѓанин. Почитувањето и вреднувањето на меѓусебните разлики е она што нè зближува, обединува и нè прави единствени во справувањето со предизвиците“, се вели во честитката на претседателот Стево Пендаровски до припадниците на албанската етничка заедница.
„Заедно растеме, учиме, се развиваме, 111 години. Честит Ден на албанската азбука!“, се наведува во придружниот текст на видео честитката на премиерот Зоран Заев објавена на Фејсбук.
Министерството за политички систем и односи меѓу заедниците, пак, вечерва од 19:30 часот во Македонскиот народен театар ќе организира свечена академија по повод Денот на албанската азбука.
На свечената академија, која е централен од серијата настани што беа организирани деновиве, најавено е присуство на претставници од Владата, Собранието, од политичките партии и дипломатскиот кор.
Оваа година првпат ќе биде доделена и државната награда „22 Ноември“ за остварувања во областа на политичкиот, културниот и општествениот живот во државата.
Добитници се истражувачот, историчар и хуманист Давид Хосафлoк и просветните работници Кимете Агаи и Аднан Агаи. Наградата ќе им биде врачена во 13 часот во Собранието.
