По третпат е одложена јавната седница во Врховниот суд за случајот „Монструм“, петкратното убиство што се случи пред пет години кај Смилковско Езеро. Седницата е презакажана за 12-ти септември, поради неисполнување на законски претпоставки.
Обвинителката на Републичкото јавно обвинителство, Љиљана Спасовска, побара од Врховниот суд пред да биде закажана новата седница, да ги прибави новите докази кои според неа се наоѓаат во СЈО.
На прашање за случајот „Монструм“, специјалната обвинителка Катица Јанева на денешната прес-конференција изрази надеж дека Советот на јавни обвинители ќе им ги достави материјалите.
„Се надевам дека Советот на јавни обвинители ќе ни ги достави материјалите. Законот е јасен, во рок од 8 дена од превземањето на предметот, ќе одлучам дали сум надлежна или не. Мислам дека има многу предмети кои требало да бидат тука, а не се отворени во овој период. Како ќе се одвива ритамот на ова Обвинителство, одлучувам јас“, рече Јанева.
Јавната седница во Врховниот суд досега два пати беше одложена, еднаш поради отстуство на адвокатот Насер Рауфи, а вториот пат по барање на адвокатот Асмир Алиспаиќ.
Петмина жртви, четирите млади момчиња – Александар Наќевски, Филип Славковски, Цветанчо Ацевски и Кире Тричковски, како и Борче Стефковски, пред пет години под сомнителни околности беа убиени на Велики четврток.
