Земјите членки на Г7 и технолошките гиганти меѓу кои и Гугл, Фејсбук и Твитер, се договорија да работат заедно со цел да го блокираат ширењето на исламистичкиот екстремизам на интернет.
„Ова се првите чекори кон поголем сојуз во името на слободата“, изјави италијанскиот министер за внатрешни работи, Марко Минити по завршувањето на дводневниот состанок на министрите од Г7, нагласувајќи ја улогата на интернет во „регрутирање обука и радикализација“ на екстремисти.
Францускиот министер за внатрешни работи Жерар Коломб изјави дека целта е проџихадистичката содржина да се отстрани во рок од два часа по објавувањето на интернет.
„Нашите непријатели се движат со брзина на твит и ние мораме исто толку брзо да им се спротиставиме, изјави американската министерка за внатрешна безбедност Илејн Дјук.
Британската министерка за внатрешни работи Амбер Рад, иако призна дека е постигнат напредок во борбата против џихадистичката онлајн содржина, таа сепак истакна дека „компаниите треба да дејствуваат повеќе и побрзо и не само за да се елиминира екстремистичката содржина, туку и да се спречи таква содржина воопшто да се објави“.
Извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
