Државната комисија за спречување на корупција и судир на интереси побара од Општина Охрид да се раскинат сите договори со фирмите во сопственост Нефи Усеини, кој воедно е и советник во Советот на Општината.
Според сознанијата Усеини добил 8 тендери за две години. Нефи стана познат октако се дозна дека е сопственик на две дивоградби во Охрид од кои едната е спорната пицерија „Луна“ за која Усеини се надева дека општината ќе ја легализира.
„Од Државната комисија за спречување на корупција, до Општина Охрид е испратен допис со мислење дека ќе настане состојба на судир на интереси доколку општината склучи договор со правно лице каде како сопственик се јавува член на Советот на Општина Охрид, а како управител се јавува член на неговото семејство.
Во дописот пишува дека советник во советот на општината, во смисла на член 8 став 2 од Законот за спречување на корупцијата и судир на интереси има статус на службено лице и извршува јавни овластувања и должности, а во насока на член 51 став 1 од истиот Закон „Службено лице во вршењето на својата функција, јавни овластувања или должности не може да воспостави деловни односи со правно лице кое е во негова сопственост или во сопственост на член на неговото семејство или во кое тој или член на неговото семејство поседува акции или удели или кое го основал тој или член на неговото семејство или во кое одговорното лице е член на неговото семејство“. Согласно член 52 став 2 од Законот за спечување на корупцијата и судирот на интереси, ако службеното лице постапи спротивно на цитираниот став 1 на овој член, на склучениот договор се применуваат одредбите за ништовност на договорот од Законот за облигационите односи.
Врз основа на ова мислење од Државната комисија за спречување на корупција, Општина Охрид ќе постапи согласно сите Законски регулативи“, се вели во соопштението на Општина Охрид.
Б. Ј.
