Јавното претпријатие „Македонија Пат“ користи законска одредница со цел да ја избегне обврската, да им ја компензира штетата што граѓаните ја претрпеле, поради лошото одржување на патиштата во државата. Според искуствата на адвокатката Сузана Јошевска Анастасовска, ЈП „Македонија Пат“, продолжува со оваа практика. Но, Владата која штопланира нова финансиска инјекција за ова јавно претпријатие, со цел „Македонија Пат“ да ги покрие долговите кон УЈП, по основ на ДДВ и данок на добивка, во висина од 7.5 милиони евра, според Јошевска Анастасовска, не смее да ги заобиколи и обврските на „Македонија Пат“ кон граѓаните.
„Сите граѓани и правни лица подлежат на Законот за извршување, со којшто се врши присилна наплата на побарувањата. Но, ЈП ‘Македонија Пат’ е привилегирано! Согласно со член во Законот за извршување, им се дозволува на јавните претпријатија да не мора да платат по правосилни пресуди, доколку со таа пресуда би се довеле себеси да им се намали минимумот потребни средства, за да може да функционираат. Тие средства се утврдуваат со вештачења од лица ангажирани од ‘Македонија Пат’, и секогаш се различни, ги монтираат според потребите… Во таква ситуација, граѓанин што има побарување од ‘Македонија Пат“, не може да го наплати, зашто ‘Македонија Пат’ секогаш се држи на минимум од овие средства и пресудата на граѓаните е неизвршлива“, изјави адвокатката Јошевска Анастасовска, во разговорот за ЦИВИЛ Медиа.
Таа тврди дека оваа појава трае со години. и дека ‘Македонија Пат’, по основ на неплатени пресуди, има наталожени многу обврски.
„Досега немам информација колкави се тие обврски, но од колеги и граѓани што ги познавам, тие се во значителен износ. Постои еден Закон за јавни патишта, којшто е донесен во 2008 година, со којшто е формирано друго јавно претпријатие за државни патишта, коешто ги прибира сите средства од користењето на автопатите, и по основ на патарини или други основи – кај него се влеваат средствата, а тоа го склучува договорот согласно со Законот, со ‘Македонија Пат’. Тоа е местото од каде што треба ‘Македонија Пат’ да се финансира … Ова за мене, стана дискутабилно, кога видов дека се подготвува некоја одлука за вбризгување парични средства во ‘Македонија Пат’ од Владата, каде што се наведува дека ‘Македонија Пат’ е должник по основ на данок на добивка и ДДВ во УЈП, во износ од 7 милиони евра. А тие сега ќе вбризгуваат 2.5 милиони евра, а никој не ги споменува овие побарувања“, додава Јошевска Анастасовска.
„Овие побарувања се изигрување на законските одредби и од Законот за државни патишта и од Законот за извршување. Мора нешто да се направи, за да може да се утврдуваат точни парични средства со коишто ќе располага, при договорот со којшто се ангажира ‘Македонија Пат’. Ова е за да стане ‘Македонија Пат’, претпријатие што ќе биде доволно финансиски моќно и соодветно да ги одржува патиштата, за да нема штети. А, доколку има, за да може да ги исплаќа тие средства… Ако пак, веќе се вбризгуваат пари за доспеани обврски, не може Владата да ги игнорира овие права на граѓаните што се утврдени во правосилни пресуди“, категорична е адвокатката Јошевска Анастасовска.
Моника Талеска
Камера: Дехран Муратов
Монтажа: Даниела Нисева
