Вицепремиерот за евроинтеграции Бујар Османи на денешната средба во Брисел со високата претставничка на ЕУ за надворешни работи и безбедносна политика и потпретседателката на ЕК Федерика Могерини, го презентирал напредокот што земјата го направила во имплементацијата на Планот 3-6-9, како и на останатите политички пречки на евроинтегративниот пат.
– Доаѓам со добри вести од Република Македонија. Онака како што ветивме пред девет месеци, навреме испорачавме реформи во соодветниот период за Извештајот на Комисијата позитивно да го оцени нашиот напредок, истакна Османи на средбата, соопшти Секретаријатот за европски прашања.
Османи притоа посочил на соодветната реализација на Планот 3-6-9, чија имплементација завршува заедно со излегувањето на Извештајот на Европската Комисија на 17 април.
– Делот три од Планот 3-6-9 го крунисавме со одржување фер, слободни и кредибилни избори уште во ноември минатата година, што беше потврдено во извештајот на ОБСЕ/ОДИХР, чии заклучоци беа повторени и од страна на Делегацијата на Европската Унија во Македонија, истакна Османи.
Во изминатиов период, според него, Владата изготвила бројни стратегии и суштински реформски закони, кои во транспарентна и инклузивна постапка, со вклучување на мислењата од опозицијата, граѓанскиот сектори и јавноста, во најголем дел се донесени во Собранието на Република Македонија.
– И во овој момент, во овие последни денови, додека го одржуваме овој состанок, во Собранието на Република Македонија се носат и последните реформски закони за кои е потребна поддршка од две третини од пратениците и за кои во последен момент се обезбеди консензус за нивно изгласување со опозицијата, рекол Османи.
Во делот на отстранувањето на политичките пречки вицепремиерот, како што се наведува, посочил и на донесувањето на Законот за јазиците, како фундаментален, но и последен сегмент од легислативниот дел од Рамковниот договор, изразувајќи притоа надеж дека имплементацијата на законот на дело ќе ја демонстрира неговата обединувачка сила во насока на изградба на цврсто, стабилно и просперитетно мултикултурно општество во Република Македонија.
– Остваривме историски напредок и во односите со соседите. Го потпишавме, а потоа и ратификувавме во Парламентот, историскиот Договор за добрососедство со Бугарија, а остваривме и исклучително значаен напредок во комуникацијата со Грција, посочил Османи.
Во периодот што претстои, очекува решение и за долгогодишниот спор со Грција, со што ќе се отстранат сите пречки на евроинтегративниот пат на Република Македонија.
Средбата на вицепремиерот Османи со високата претставничка на ЕК Могерини се одржува во пресрет на излегувањето на Извештајот на ЕК за напредокот на Македонија на 17 април.
Во рамките на посетата на Брисел, Османи ќе има средби и со други високи претставници на телата на ЕУ, меѓу кои и со Геновева Руиз Калавера, директорка на одделот за Западен Балкан во рамките на Директоратот за проширување – ДГНЕАР, со холандскиот евро-пратеник Ханс Ван Баален кој ја предводи групата „Пријатели на Македонија” во Европскиот парламент, како и со Пјотр Серафин, шеф на кабинетот на претседателот на Европскиот совет, Доналд Туск, соопшти СЕП.
Извор: МИА
