Министерот за надворешни работи, Бујар Османи учествуваше во онлајн дебатата на Сегментот на високо ниво на 46та сесија на Советот за човекови права на ОН во Женева, соопшти МНР.
„Ќе можеме успешно да ја спречиме ерозијата на хуманоста и солидарноста, како фундаментални принципи, само со прифаќање и спроведување на мерките кои во својот фокус ќе ја имаат човечката димензија“, истакна Османи.
Констатирајќи дека пандемијата на Ковид-19 влијае врз секојдневниот живот и економските токови на глобален план, со своевидна рефлексија и врз уживањето на човековите права и слободи, министерот Османи, во своето излагање се заложи за засилена соработката и координација во рамките на меѓународната заедница.
Во делот на дискусијата за справување со предизвиците на пандемијата, тој се осврна на мерките и активностите што Владата ги презема за справување со последиците од пандемијата Ковид-19, како и за спроведување на политиките во доменот на заштитата и унапредувањето на човековите права.
На сесијата на Високиот сегмент која трае од 22-24 февруари, учествуваат десетина шефови на влади и држави, и над сто и дваесет министри за надворешни работи, со цел да ја реафирмираат важноста на работата на Советот за човечки права и неговите механизми за справување со предизвиците за уживање на човековите права и слободи глобално, особено за време на Ковид-19 пандемијата.
