Мика Бојстер, првиот човек на Германската унија на новинари, кој беше еден од учесниците на неодамнешната конференција за одбрана на демократијата во Скопје, објави остар коментар во Франкфуртер Алгемајне Цајтунг по повод поддршката што ја даде Илон Маск на германскиот АФД.
Маск во декември 2024 на својата платформа Х објави дека само АФД ќе ја спаси Германија, а германскиот канцелар Олаф Шолц го нарече меѓудругото „неспособна будала“, повикувајќи го на оставка.
Olaf ist ein Narr https://t.co/Yye3DIeA17
— Elon Musk (@elonmusk) November 7, 2024
Социјалдемократот Шолц, во интервју за списанието „Штерн“, од 4 јануари, истакна дека не му пречат нападите на Маск кон него или кон други германски политичари, туку дека поддршката на милијардерот за екстремната десница е многу позагрижувачка.
„Далеку повознемирувачки од таквите навреди е фактот што Маск поддржува екстремно десничарска партија како АфД, која се залага за зближување со (рускиот претседател Владимир) Путин и се обидува да ги ослабне трансатлантските односи“, рече Шолц.
Во меѓувреме група од 42 европски пратеници побараа Европската комисија да истражи дали сопственикот на социјалната мрежа Икс, Илон Маск ја зголемува дистрибуцијата на сопствените коментари на начин што го прекршува правото на Европска Унија. Европратениците стравуваат од влијание врз јавната безбедност. Зголемувањето на стравовите се однесува и на објавите на Маск за теми поврзани со ЕУ и нејзините земји-членки, пријателската пропаганда за Кремљ за војната во Украина и антисемитските теории на заговор, наведуваат европратениците во нивното писмено барање до ЕК.
Во четвртокот Маск ќе ја искористи својата платформа за да ја угости Алиса Вајдел, шефицата на германската екстремно десничарска, антиимигрантска Алтернатива за Германија (АФД).
За многу германски политичари ова е политичко мешање на Маск, особено што АФД е втора на анкетите пред парламентарните избори на 23 февруари.
Маск неколку пати зборуваше во корист на АФД во последните недели и напиша многу контроверзна статија за Welt am Sonntag во која ја нарече АФД „последна искра на надеж“ за Германија.
Својата интервенција во тоа време Маск ја оправда поради финансиската инвестиција на неговата компанија Тесла во Германија. Тој рече дека прикажувањето на АФД како десничарска и екстремистичка е „јасно лажно“, бидејќи Алис Вајдел имала истопол партнер од Шри Ланка.
Германските безбедносни служби ја означија АфД како десничарска или сомнително екстремистичка, а судовите пресудија дека таа остварува цели против демократијата.
Додека Олаф Шолц се обидуваше да остане смирен, кандидатот за канцелар на германските „Зелени“ , Роберт Хабек, беше поостар: „Тргнете ги рацете од нашата демократија, господине Маск“.
Лидерот на либералната ФДП, Кристијан Линднер, посочи дека целта на Маск можеби е да ја ослабне Германија во интерес на САД, „препорачувајќи да гласаме за партија која ќе ни наштети економски и ќе не изолира политички“.
Поранешниот шеф на дигиталната агенда на Европската комисија, Тиери Бретон, минатиот викенд излезе на X за да ја предупреди Алиса Вајдел, кандидатот за канцелар на АФД, дека разговорот во живо со Маск во четврток ќе и даде „значајна и вредна предност во однос на вашите конкуренти“.
Европската комисија соопшти дека нема ништо во правилата за дигитални услуги на ЕУ што забранува пренос во живо или за некој што изразува лични ставови.
Сепак, портпаролот предупреди дека сопствениците на платформата не треба да обезбедуваат „преференцијален третман“. Платформата Х на Маск е веќе под истрага и ЕУ, а преносот во живо ќе биде предмет на таа истрага, пишува Би-би-си.
Б. Ј.
