Група европски пратеници бараат Европската комисија да истражи дали сопственикот на социјалната мрежа Икс, Илон Маск ја зголемува дистрибуцијата на сопствените коментари на начин што го прекршува правото на Европска Унија.
Барањето уследи по објавената студија на Универзитетот во Квинсленд во Австралија, кој ја испитуваше распространетоста на коментарите на Маск во изминатите месеци, пренесува МИА.
Маск, кој е сопственик и на „Тесла“ и на „СпејсИкс“, исто така е влијателен соработник на новоизбраниот американски претседател Доналд Трамп, а неодамна беше номиниран да го води новиот Оддел за владина ефикасност.
Барањето на ЕП го потпишаа 42 пратеници од различни фракции. Тоа сугерира дека алгоритмите неодамна се префрлија во корист на сопствените коментари на Маск. Ова ги вклучува и процесите со кои се одредува каде и како тие се појавуваат на платформата. Истражувачите известуваат дека откако Маск ја објави својата поддршка за Трамп во јули, бројот на прегледи на неговите коментари вртоглаво се зголеми.
Иако коментарите на други влијателни политичари беа исто така често прегледувани за време на изборната кампања во САД, оние на Маск имаат неверојатно поголем пораст.
Според авторите на студијата, резултатите сугерираат дека специфичните предности за видливост можеби селективно се применуваат на платформата.
Европратениците стравуваат од влијание врз јавната безбедност.
Зголемувањето на стравовите се однесува и на објавите на Маск за теми поврзани со ЕУ и нејзините земји-членки, пријателската пропаганда за Кремљ за војната во Украина и антисемитските теории на заговор, наведуваат европратениците во нивното писмено барање до ЕК.
Покрај многуте неумесни и навредливи коментари на Маск кон јавните личности со кои има спротивставени мислења, тој неодамна, веднаш по објавата за распад на германската владејачка коалиција, во објава на неговата мрежа Х го нарече германскиот канцелар Олаф Шолц – будала.
„Олаф е будала“ (Olaf ist ein Narr), напиша Маск.
Olaf ist ein Narr https://t.co/Yye3DIeA17
— Elon Musk (@elonmusk) November 7, 2024
