Осумдесет и два обвинители од јавните обвинителства од Скопје, Велес, Гостивар и од други градови низ земјава ја тужат државата пред домашните судови, за неисплатени додатоци во вкупен износ од 23,5 милиони денари, или приближно 400 илјади евра, без камати и судски трошоци.
Информацијата е потврдена од Министерството за правда. Од таму тврдат дека делумно се обезбедени средства во буџетот за таквата намена, но од таа ставка треба да им се исплатат и надоместоци на јавнообвинителските службеници и другите обврски кон физичките и правните лица и други акти на Јавното обвинителство.
Јавните обвинители и судиите од 2015 година треба да добиваат повисоки плати за прекувремена работа и за работа на празници од 35 до 50 отсто.
Судскиот буџетски совет донесе одлука за ретроактивна исплата на додатоците за плата за месеците септември и октомври 2018 година за судиите и членовите на Судскиот совет. Здружението на судии ги охрабри судиите да ја тужат државата за несиплатените додатоци до 35% за изминатите години.
