ЏАБИР ДЕРАЛА
Читајќи ги вестите…
СДСМ уште еднаш ги повика Христијан Мицкоски и ВМРО-ДПМНЕ „да покажат дека навистина се за правда и неселективно владеење на правото“. Тие очекуваат од своите политички ривали да ја докажат таквата заложба (за правда) со тоа што ќе „дадат придонес да се донесе Законот за Јавно обвинителство и да докажат со дела, а не само со зборови дека се за неселективно владеење на правото“.
Овој повик е во дијаметрална спротивност со повиците на ВМРО-ДПМНЕ кои во своите соопштенија се потпираат врз содржини што се појавуваат во медиумите како Инфомакс и Курир во земјава или Ла Верита и Фејсбук објавите на веќе добро познатиот Гајсер кој стои зад објавувањето на „бомбите“ за случајот „Рекет“.
„Крајно време е ЈО да се охрабри и да го повика Зоран Заев на распит. Милионски рекет во времетраење од неколку месеци не може да се случи без институциите на системот, а со тоа и премиерот лично да не знаат“ – повикува ВМРО-ДПМНЕ во своето соопштение од 1 септември.
И додека СДСМ бара од ВМРО-ДПМНЕ да овозможи донесување закон за јавно обвинителство, ВМРО-ДПМНЕ упорно тврди дека „развлекувањето на случајот Рекет може сериозно да го стави под знак прашалник нашето отпочнување на преговори со ЕУ“.
Веднаш по соопштувањето на резултатите од истражувањето на Тим Институт, ВМРО-ДПМНЕ нервозно го реактивира своето барање за предвремени избори со формулацијата: „Граѓаните не заслужуваат да бидат жртви заради погубните и криминогени политики на Заев. Власта треба да распише предвремени парламентарни избори час поскоро. За иднината на Македонија се работи.“
Наспроти изјавите на Јавното обвинителство дека Зоран Заев не е инволвиран во случајот „Рекет“, ВМРО-ДПМНЕ упорно го тврди спротивното, но никако не се појавува со докази пред релевантните институции. Се наметнува прашањето, дали тие знаат нешто повеќе од тоа што го кажуваат или само водат пропагандна војна. Одговорот на ова прашање, самиот се наметнува…
Како и да е, во своето соопштение, СДСМ не им останува должно, па вели: „Како што се размотува клопчето во случајот „Рекет“, така стравот и нервозата во ВМРО-ДПМНЕ стануваат се поголеми. Заврши времето кога од партиски штабови се командуваше како да се водат истраги, како се нарачуваат судски процеси и пресуди. Градењето на независен, професионален и неселективен правосуден систем ги покажува вистинските резултати. Денес, правната држава функционира неселективно за сите.“
Едноставно, изгледи за приближување на ставовите на повидок нема. Законот не е донесен, ВМРО-ДПМНЕ бара избори и обвинува за вмешаност во „Рекет“, а владејачката партија токму тој случај го смета како успех на институциите на правдата и порачува: „Нема да успеат обидите да се попречи правдата или истрагата да се насочи во друга насока. Секој кој ги прекршил законите ќе одговара.“
Ова нема крај. ВМРО-ДПМНЕ бара разврска на „Рекет“ во екот на очигледна разврска, а истовремено Законот за Јавно обвинителство сѐ уште е заглавен во собраниска процедура.
Сосема е очигледно… Главните протагонисти во предметите на СЈО имаат силно упориште во ВМРО-ДПМНЕ, впрочем, тие се и функционери на партијата, кои на секаков можен начин ја опструираат правдата од првиот ден на постоењето на СЈО.
Според нив, правда не смее да има, па нека биде тоа и по цена на предвремени избори, политичка криза, меѓуетнички тензии, прекинување на сите процеси, почнувајќи од помирувањето, завршувајќи со напорите за отпочнување преговори за членство во ЕУ.
Преземање на содржините e ЗАБРАНЕТО (!!!), освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста. Повредата на авторските права е забранета со закон. Врз основа на договор за соработка, оваа содржина е достапна за Плусинфо и Слободен печат без ограничувања.