Во фокусот на ЦИВИЛ денеска е „Етничката омраза од собраниската говорница“, односно улогата на политичарите и нивното спознавање на мултикултурализмот, институционалната застапеност, (не)дискриминацијата на општествено и институционално ниво.Учесници на панелот се пратениците Зекир Рамчиловиќ, Љатифе Шиковска и Мартин Костовски.
„Јас не сакам да бидам запомнет како пратеник што во делот на толку многу битно историско прашање имав средба со еден, како да го кажам, пратеник од опозицијата којшто на крајно невротичен начин сакаше и бараше инцидент цело време. За жал, ќе додадам дека ккао пратеници од власта или проевропски пратеници бевме изложени скоро три дена на канонада како во Собранието така и надвор од него, на пцовки, навреди и што уште не“, изјави пратеникот Мартин Костовски.
„За жал, поради тие дневно партиски интереси, буквално од никаде ништо за нешто што со преговарачката рамка воопшто не се загрозува… Ние пратениците сме тие што треба да имаме релаксирани односи во поглед на етничката, верската или некоја друга припадност, а не да се поведуваме по граѓаните, кои можеби дел се изманипулирани, некои можеби таква им е мислата“, вели Рамчиловиќ.
„Во Собранието изгласаме Кодекс на однесување на нас како пратеници, но очигледно не секогаш се придржуваме, особено да внимаваме кога се излегува на говорница што зборуваме, како што се случуваше во последните денови. Несоодветно е да се навредуваме и тоа да оди во бескрај… Понекогаш опозицијата не бира средства да говори и тоа што треба и тоа што не треба“, вели пратеничката Шиковска.
