На сопствен ризик новиот портпарол на СДСМ Костадин Костадинов вчера побара ОЈО да ја истражи вистината за спрегата на Христијан Мицкоски со неговиот ментор Никола Груевски и шемите за хидроцентрали.
Зошто на сопствен ризик – затоа што очекувано беше ВМРО –ДПМНЕ да врати на ваков тежок удар по нивниот интегритет и нели чистиот образ.
Па така денеска ВМРО – ДПМНЕ излезе со соопштение дека Портпаролот и пратеник од СДСМ Костадин Костадинов ја вработил мајка му Фанија Костадинова во Централниот регистар на Струмица.
И затоа што немало непотизам во нивно време, односно имало ама тоа е минато, а ние сега чекориме кон иднината, па овој СДСМ –овски непотизам е пострашен и крајно неморален.
„Дали пред време се знаело дека мајката на портпаролот Костадин Костадинов ќе биде вработена во институцијата и затоа се бара исполнување на само два основни услови? Дали мајката на Костадинов e најмладиот и најперспективниот кадар со средно образование во Струмица и околината?“, прашуваат од ВМРО – ДПМНЕ.
Во очекување како ќе одговори на овие вмровски факти Костадинов, фокусот на СДСМ, како партија на власт, е за нив многу пострашен конфликт на интереси.
„Во време кога Мицкоски му бил советник на Никола Груевски, преку фирмата „Енерготек ДОО Скопје“ во која лично тој има удел, од Владата добил 33 илјади метри квадратни земјиште за изградба на хидроцентрала“, велат од СДСМ.
Понатаму, во предвид треба да се има дека на компанијата „Енерготек ДОО Скопје“, покрај Мицкоски сопственик е и Димитар Димовски, член на Извршниот комитет на ВМРО-ДПМНЕ.
Документите за оваа „зделка“ се јавно достапни, Костадинов уредно ги презентираше на вчерашната прес – конференција, а од ОЈО се очекува да реагира што може побрзо. Тоа дека мајката на Костадинов е вработена во Централен регистар во Струмица, излегува дека Костадинов и бил скромен.
Како и да е ВМРО – ДПМНЕ упорно докажува дека Заев и СДСМ ги уништија институциите, а СДСМ очекуваат истите тие институции да си ја вршат работата согласно законите. Тоа подразбира и Мицкоски еден ден во блиска иднина во чекори да го стигне менторот Груевски?
Желбите се едно, можностите сосема друго. Во очекување Груевски конечно да го премине прагот на Шутка, а Мицкоски да го смени во обвинителска клупа препорака е да се искористи убавото време за прошетка и пуштање мозок на паша од дневно политички партиски лакрдии.
Б. Јордановска