Самитот ЕУ-Западен Балкан во Софија е во медиумскиот фокус на Македонија, особено поради присуството и обраќањето на премиерот Зоран Заев. Европската унија денеска ќе даде ново ветување за членство на своите партнери од Западен Балкан во момент кога шесте земји, меѓу кои Македонија се наведени во нацрт-декларацијата што ќе биде усвоена во Софија, но без најпосакувана награда – датум на пристапување.
Во Софија денеска, на маргините на Самитот, заврши и средбата меѓу Заев и Алексис Ципрас. Овој раговор се најавуваше како клучен во процесот на решавање на спорот со името и дека можеби од неа ќе произлезе конечниот договор за името. По прес-конференцијата на Заев, останува одговорот дека постои една опција за која се согласиле со Ципрас како можно решение за името.
Во Кривичниот суд се дадоа завршните зборови за случајот „Тенк“, по што се очекува донесување пресуда, која ќе биде прва пресуда за Никола Груевски од 5 обвиненија кои му ги покрена Специјалното јавно обвинителство. Ново рочиште се одржа за предметот „Шпион“ во кој се осудени се 18 лица за злосторничко здружување, шпионажа, уцена, измама и недозволено поседување оружје. Ново рочиште беше одржано и за „Трезор“ во кој поранешниот директор на УБК Сашо Мијалков, поранешниот шеф на неговиот кабинет Тони Јакимовски, поранешниот помошник-министер во МВР Небојша Стајковиќ и поранешениот началник на Петтата управа во МВР Горан Грујевски обвинети за злоупотреба на службената положба и овластувања и предизвикување штета на Буџетот во висина од 862.045 евра за набавката на електронско-комуникациска опрема.
По повод Mеѓународниот ден за борба против хомофобијата, трансфобија и бифобија, 17 мај, ЦИВИЛ порача наместо страв, омраза, дискриминација да сеориентираме кон хуманост, солидарност и прифаќање дека сите поединици, независно од нивната родова, верска, етничка, сексуална и друга припадност имаат право на достоинствен живот, а сите ние како заедница да ги штитиме и нивните права и слободи.
