Пекарниците и големите производители на леб уште од летото бараа субвенционирана цена на електрична енергија со цел граѓаните да не плаќаат скап леб, сепак тие ја искористија помошта, но одбија да ги намалат цените на лебот и да овозможат граѓаните во време на криза да купуваат евтин леб.
Владата во четвртокот донесе одлука со која се наложува на производителите на леб да мора да произведуваат најмалку 80 отсто бел и полубел леб во однос на количеството производено во декември лани на производителите на леб не им се допадна оваа одлука, но после дводневен бојкот сепак ја намалија цената на лебот и ги наполнија рафотвите.
Ваквата одлука беше поздравена од граѓаните, а од пекарската индустрија најавија дека ќе започнат со испорачување на бел и полубел леб за 33 денари, но сепак се заканија дека ќе ја тужат државата за да наплателе штета што ќе била предизвикана од владината одлука.
Какви беа профитите за време на ковид кризата?
Кога ќе се погледнат бројките за приход и добивки за 2021 година, може да се види дека најголемите производители на леб имале добивки од неколку стотици илјади евра. Како што објави порталот „Пари“, Најголем профит во 2021 година прикажала фурната „Диме“ од 400.000 евра. „Жито Скопје Силбо“ која е особено позната по своите пекари во Дебар Маало и во Аеродром во 2021 година имала профит од 289.000 евра. „Жито леб Охрид“ , пак во 2021 година успеал да се извлече од лошата финансиска состојба во која западнал во 2020 година кога завршил со загуба од 276.000 евра и да направи добивка од 200.000 евра.
Сепак и покрај ваквите бројки, во време на глобална економска и енерегетска криза, кога им беше обезбедена субвенционирана цена на електрична енергија од парите на граѓаните, тие одбија да продаваат леб по евтина цена.
Бојкотот и непроизведувањето на евтин леб од страна на пекарниците во Скопје наиде на остри осуди од страна на граѓаните, кои во медиумските анкети бараа нови мерки од страна на владата, поради како што велат, лакомоста на големите компании кои произведуваат леб и да остваруваат милионски профити на грбот на граѓаните.
С.Т.
