Десет домашни реномирани компании денеска го добија престижното признание „Македонски квалитет 2022“ кое го доделува Сојузот на стопански комори на Македонија под покровителство на претседателот нa државата. Признанијата ги доделија претседателот на Р. С. Македонија Стево Пендаровски и претседателот на Сојуз на стопански комори на Македонија Трајан Ангелоски.
Комисијата согласно прецизно воспоставените критериуми внимателно ги селектираше македонските претставници кои имаат традиција во создавање и одржување на национален бренд. Добитници на признанијата за 2022 година се „Гео мрежа“, „Донирај компјутер“, „Дуна“, хотелите „Климетица“ и „Маива“, „Слога“, „Вита Нова“, „Перпетуумобиле секјурити“, „Бовин“, „Тримекс“ и „Рептил“.
Во знак на одлична соработка и поддршката за унапредување на економското окружување која ја дава претседателот Пендаровски, Сојузот му врачи Признание.
Претседателот Пендаровски упати честитки до компаниите, посочувајќи дека претставува задоволство да се наградат оние македонски брендови кои не правејќи компромис со квалитетот, остануваат доволно атрактивни и за клиентите и за потрошувачите.
„Имајќи ја предвид сложената економска состојба, овие претпријатија не само што не отстапија од својата посветеност на квалитетот, туку со тоа придонесоа и за повисок економски раст, што е национален приоритет број еден. Овој приоритет подразбира зголемување на продуктивноста, подигнување на конкурентноста на економијата, масивно вложување во иновациите и технолошкиот развој и нови домашни и странски инвестиции. Многу од овие аспекти зависат токму од подготвеноста на секоја од компаниите да не отстапат од парадигмата на квалитетот и во кризни и во мирни времиња“, истакна во обраќањето претседателот Пендаровски.
Оваа манифестација се одржува секоја година во знакот на оддавање признание и промовирање на деловните успеси на македонските претставници на национален бренд за тековната година.
М. Д.