Претседателот на Република Северна Македонија, Стево Пендаровски, денеска оствари средба со раководството на Стопанската комора за информатички и комуникациски технологии (МАСИТ).
На средбата Пендаровски се запозна со тековните активности на МАСИТ, како стопанска комора којашто во себе обединува компании од сите ИКТ сектори, како и со нивните заложби за раст на ИКТ бизнисот во Северна Македонија, негова препознатливост, а со цел посилна, поорганизирана и прогресивна ИКТ индустрија.
Пендаровски ја истакна потребата Северна Македонија да се поврзе со светот, за што очекува придонес од ИКТ индустријата. Како важен предуслов за тоа ја посочи потребата од стабилна политичка состојба, за која рече дека во последните години се движи во добра насока.
„За да биде напредна државата, мора да имаме стабилна политичка состојба. Во последните години ние одиме по добар пат кон политичка стабилизација, одиме забрзано кон НАТО интеграцијата. Идното членство на државата во НАТО ќе има позитивни импликации за развојот на економијата и за влез на странски инвестиции. За Европската унија очекуваме датум за почеток на преговорите, но сакам да нагласам дека вие мора да бидете вклучени во пристапните преговори, барем во половина од поглавјата“, рече Пендаровски.
Од страна на претставниците на МАСИТ беше истакнато дека Пендаровски е прв претседател што остварил средба со нив и покажал интерес за соработка. Од своја страна, Пендаровски го прифати барање на МАСИТ да биде промотор на ИКТ индустријата.
