Министерката за одбрана Славјанка Петровска во гостувањето на ТВ21 изјави дека секоја хибридна војна има цел, а една од претпоставките е дека со последните лажни дојави за бомби напаѓачот не сака стабилен и мирен Балкан. Таа додаде дека освен кај нас, зачестени дојави имало и во Црна Гора.
Сценариото е да се поремети мирниот и стабилен Балкан и целта на хибридните војни е да дојде до промена во општественото живеење што би создало незадоволството. Со тоа незадоволство да се предизвика пад на владите кои се прозападно ориентирани. Ова е една од претпоставките зошто ова се случува во Република Северна Македонија и Црна Гора, истакна Петровска.
Таа додаде дека треба да се инвестира во јакнењето на кибер капацитетите на домашните институции.
Разузнавачите служби испитуваат дали има домашни помагачи, нагласи Петровска одговарајќи на новинарско прашање, без да споделува детали од истрагата.
Целта беше да се создадат паника и страв кај населението. Напаѓачот ги познаваше нашите прилики и протоколите кои ги преземаме како земја, рече Петровска.
Таа додаде дека целта била и да се подриваат институциите, но тие веднаш одговарале на предизвикот.
Ова е војување со неконвенционални средства, затоа се специфични овие закани и изискуваат зголемен капацитет на институциите и целото општество. Институциите се први и се одговорни, но треба да се гради и општествената отпорност. Но и да се градат капацитетите на институциите. Тоа значи дека субјектите треба да знаат кои се заканите пред кои стои Република Северна Македонија. Институциите одговараат онака како што можат, но треба да реагира и општеството, како медиумите, невладините организации и други, истакна Петровска.
Според информациите, сподели Петровска, земјава не е под директна изложеност на дојавите за бомби. Таа додаде дека можеби една од причините што стивнаа лажните дојави за бомби е дека е влезено во трага на испраќачот.
