Студентите во блокада и граѓаните кои ги поддржуваат продолжија да ги блокираат зградите на Радио-телевизија Србија (РТС) на улицата Таковска и на Кошутњак во Белград. Студентите и граѓаните и утрово ги блокираат влезовите во објектите на РТС на улиците Таковска и Абердарева, како и студијата на Кошутњак, онеспособувајќи ги вработените да дојдат на работните места.
Студентите во блокада ги блокираат зградите на јавниот сервис од 14 април во 22.00 часот, а навеле дека блокадата ќе трае „сè додека не се распише нов конкурс за членови на Советот на Регулаторното тело за електронски медиуми (РЕМ)“.
Белградските и новосадските студенти и на 10 март навечер ненадејно се собраа пред јавните медиумски сервиси и ги блокираа сите влезови, барајќи објективно известување за протестите.
РТС јави дека поради отежнатите услови за работа предизвикани од блокадата биле приморани да ја прилагодат програмската шема, поднесена е кривична пријава до Првото основно јавно обвинителство во Белград против непознато лице, и побарана е реакција од меѓународните институции, пишува РСЕ.
