По замрзнувањето на цената на лебот, министерот за економија Крешник Бектеши за денес најави дека ќе биде донесена одлука за замрзнување и на цените на тестенините и на млечните прооизводи.
Со ваквата одлуката , со новото замзнување на цените ќе бидат опфатени макароните, шпагетите, белото сирење, млекото, урдата,…
Според министерот Бектеши, се очекува тестенините да поевтинат за најмалку десет проценти, додека за млечните производи ќе се причека производителите до денес да се подготват зашто, како што изјави, некои веќе и самите ги намалуваат цените.
– Граѓаните да бидат спокојни, цените ќе бидат намалени не само на овие производи. Ние во континуитет ќе продолжиме со сите производи каде анализите ќе покажат дека има поголеми профити или маржи од она што е редовно, истакна вчера Бектеши.
За одлуките за замрзнување на цените, како што најави Бектеши, се очекува во текот на денот да информираат заедно со премиерот Димитар Ковачевски.
Вицепремиерот за економски прашања, Фатмир Битиќи најави нова листа на продукти со пониски цени.
-Донесена е одлука за намалување на царинските давачки за тестенините и доматното пире, кои треба да придонесат за намалување на цените. Се прават анализи за млекото и млечните производи. Следната недела ќе биде објавена нова листа на продукти со нови мерки, рече Битиќи.
На крајот на февруари, Владата ја замрзна цената на белиот и полубелиот леб од 450 грама на 33 денари откако анализите на Министерството за економија и инспекциските контроли покажаа дека дел од компаниите не ги намалиле цените соодветно иако користеле субвенционирана електрична енергија.
М. Д.