ДРАГАН МИШЕВ
Извесна естрадна иницијатива, насловенка како „Концертен караван“ од 26.08 до 24.09, со постер кој се споделува во елекстронска форма, на кој нема конкретни информации – кој го организира, во кој градови ќе се случува – каде стои само почетниот и крајниот датум и едно лого во левиот агол од кое можете едвај да се прочита „Македонијо во срце те носиме“, го привлекува вниманието на јавноста и на корисниците на социјалните мрежи, и според тајмингот избран за одржување, како и според учесниците на него.
Еден корисник на социјалната мрежа Х, во објавата во која го споделува постерот за Концертниот караван, иронично вели:
„Во Македонија ние не велиме “предизборни хепенинзи на државна сметка”, туку велиме “концертен караван” и јас мислам дека тоа е прекрасно“.
Во Македонија ние не велиме “предизборни хепенинзи на државна сметка”, туку велиме “концертен караван” и јас мислам дека тоа е прекрасно 😍 pic.twitter.com/RCJO3B0uNO
— Чак на Ориз (@ChakNaOriz) July 30, 2025
Корисниците на социјалните мрежи пишуваат дека нема лошо кога караванов нема да се организира заедно со предизборна кампања, со констатација дека:
„Истиве пеачи во караван, истиве во кампања. Проѕирно малку“.
На медиумите речиси и да нема информација за овогодинешниот настан, освен кога пребарувањето според логото од левата страна на постерот – „Македонијо во срце те носиме“, ќе ве одведе до истоимената фејсбук страна, на која покрај видеата со песни од изведувачи кои се наоѓаат на постерот, на кавер фотката исто така стои најавата за Концертниот караван, со истите штури информации.
На страницата се споделени и линкови со благодарност за поддршката од неколку медиуми (блиски до партијата на власт), каде најавите за песните се придружени со ист текст во кој се наведува дека „Проектот „Македонијо, во срце те носиме“ е повеќе од музика – тој е патриотска мисија, културно будење и звук на националното единство. Под уметничка закрила на Скендеровски продукција“.
Редакцијата на ЦИВИЛ Медиа се обрати до Скендеровски продукција за информации во врска со Концертниот караван од 26.08 до 24.09, за тоа кој го финансиера караванот, кој се спонзори и донатори на истиот.
До денес не добивме одговор.
Како основачи/сопственици на Скендеровски продукција, со по 50% учество се појавуваат Васил Скендеровски и Бојана Скендеровски, позната по изведбата на препевот на „Заветна“ која стана химна на ВМРО ДПМНЕ, изведувана на партиски митинзи и собиранки пред и за време на минатите парламентарни и претседателски избори, на кои учествуваа и речиси сите пејачи кои се појавуваат на плакатот за Концертниот караван.
Како што објави Државната изборна комисија (ДИК), според законот изборната кампања за првиот криг почнува на 29 септември во 00.00 часот и трае непрекинато до 17 октомври до 24 часот. За вториот круг изборната кампања трае до 31 октомври до 24 часот.
Дали со Концертниот караван организиран од 26.08 до 24.09, означен како патриотска мисија, културно будење и звук на националното единство, составен исклучиво од пејачки и пејачи – учесници на претходни изборни митинзи на една партија, уште еднаш се изнаоѓа начин да се заобиколат законските рокови, и трката за локалните избори да се започне пред предвидениот рок?
