Амбасадата на Полска во Минск ги повика полските граѓани „веднаш“ да ја напуштат Белорусија на 25 септември, во услови на зголемени тензии што произлегуваат од целосната инвазија на Русија во Украина, пренесува Кијив Индипендент.
„Во случај на драстично влошување на безбедносната состојба, затворање на границите или други непредвидени околности, евакуацијата може да се покаже значително потешка или дури и невозможна“, се вели во соопштението на амбасадата.
Предупредувањето доаѓа во услови на зголемени тензии меѓу НАТО и Русија по серијата повреди на воздушниот простор, како и „повторените произволни апсења на полски граѓани“.
Во текот на изминатиот месец, руски беспилотни летала го нарушија полскиот, романскиот и можеби данскиот воздушен простор.
На 19 септември, Естонија ја обвини Русија за нарушување на нејзиниот воздушен простор со три борбени авиони МиГ-31, кои останаа во естонскиот воздушен простор 12 минути. Додека, само денес, унгарски борбени авиони пресретнаа пет руски авиони над Балтичкото Море.
Блумберг објави на 25 септември дека европските дипломати ги предупредиле руските претставници оваа недела дека НАТО е подготвено да одговори на понатамошни нарушувања на воздушниот простор со сила, вклучително и со соборување на руски авиони.
Иако Белорусија не е директно вклучена во целосната инвазија на Русија во Украина, земјата ги поддржуваше движењата на руските трупи во текот на целата војна. На почетокот на целосната инвазија, Белорусија дозволи нејзината територија да се користи како појдовна точка за обидот на Русија да го заземе Киев од јужната граница.
Во последната недела, во услови на заострени тензии, земјата беше домаќин на руски трупи за време на руско-белоруските воени вежби „Запад-2025“.
Полските претставници, исто така, ја засилија реториката кон Русија во последните недели по упадот на руски беспилотни летала на полска територија на 10 септември.
Во услови на очигледна промена на реториката на американскиот претседател Доналд Трамп кон Москва, полскиот министер за надворешни работи Радослав Сикорски сигнализираше поддршка за соборување на руски авиони, пишувајќи „Roger that“(razbrano) на социјалните медиуми како одговор на коментарот на Трамп дека сојузниците на НАТО треба да го соборат авионот.
Roger that. https://t.co/SPs85U7yPd
— Radosław Sikorski 🇵🇱🇪🇺 (@sikorskiradek) September 23, 2025
И покрај повиците на Полска да ја напушти земјата, Варшава на 24 септември го укина затворањето на границата со Белорусија, воведено за време на вежбите „Запад-2025“.
Премиерот Доналд Туск нагласи дека опцијата за повторно затворање на премините останува на маса.
„Доколку се зголеми тензијата или агресивното однесување на нашите соседи, нема да се двоумиме и повторно ќе одлучиме да ги затвориме премините“, рече тој.
Д. Мишев
