Делегација од Северна Македонија, составена од Џелал Хоџиќ, заменик-директор на Агенција за остварување на правата на заедниците, Владо Бучковски, дел од Центарот за правна аргументација и реторика “Иво Пухан”, при правниот факултет, Жарко Камчев и Ненад Живковиќ од Заедницата на Хрвати во Северна Македонија, денеска се на работна посета во Европскиот Парламент во Брисел.
Делегацијата оствари работни средби со Валтер Флего, европратеник од Хрватска, од групата на либералите, Клемен Грошев, европратеник од Словенија, од групата на либералите, Илхан Ќучук, европратеник од Бугарија, од групата на либералите, Тонино Пицула, европратеник од Хрватска, од групата на Прогресивниот сојуз на социјалисти и демократи и Карло Реслер, европратеник од Хрватска, од групата Европската народна партија.
Делегацијата на Северна Македонија побара поддршка од европратениците за помалкубројните заедници и нивните проектни активности во Северна Македонија и на Западен Балкан. Побарана е поддршка за убрзан пат на Северна Македонија во ЕУ. На европратениците им укажано дека успешниот македонски модел може да послужи за пример во надминување на предизвиците и на другите држави од Западен Балкан на патот кон европските и евро-атланските интеграции.
“Интеграцијата на Северна Македонија во ЕУ е од огромно значење за помалкубројните заедници. Тие се секогаш заинтересирани за повеќе демократија, слобода и европски вредности” – изјави Џелал Хоџиќ, заменик директор на АОПЗ и претседател на СДА Македонија.
“Верувам во најавите дека до 2030 год Република Северна Македонија ќе стигне до полноправно членство во ЕУ. Меѓународната заедница го заврши својот дел од обврската со деблокирањето на европскиот пат, сега зависи од нас самите и постигнувањето на консензус за Уставните измени кај нас.” – изјави Владо Бучковски, професор на правниот факултет на УКИМ.
Заедниците на Хрватите, Бугарите, Египќаните, Торбешите, Црногорците и Евреите во нашата држава очекуваат да станат дел од преамбулата на Уставот на Република Северна Македонија.
