Понеделничка летаргија на македонската политичка сцена. Од поинтересните настани конечно се појави долгоочекуваното контра(нешто) на ВМРО ДПМНЕ. Токму кога помисливте дека заврши ерата на контрирање, историјата се повторува. Имено, Мицкоски повика на протест за правда кој е планиран за утре од 18 часот. Овој повик следува по минатонеделниот марш за правда кој го организираше СДСМ.
Остатокот од денот, неочекувано, помина со минимални препукувања меѓу опозицијата и власта. Речиси како да не се ближат избори. Единствено Државната изборна комисија е тука да не потсети дека време нема, а тие работат на организирањето на изборите на 12 април. Увидот во Избирачкиот список е најавен за среда, а за парите од платената политичка програма ќе се натпреваруваат 242 медиума од кои 159 портали.
Можеби предизборната атмосфера делумно замре и поради корона вирусот кој тропа на нашите врати. Институциите имаа повеќе координативни средби по кои најавија преглед на сите лица кои влегуваат во земјата. Инфективната клиника во Штип ќе биде карантин доколку корона вирусот се појави во земјата.
Од меѓународна поддршка, Северна Македонија денеска доби одлични сигнали од учесниците на конференцијата „Од Солун до Загреб“ која се однесува на европските перспективи на Западен Балкан.
Маја Ивановска
