Повеќе од 200 лица се водат како исчезнати во еден округ во северозападен Пакистан како резултат на катастрофалните поплави и лизгања на земјиштето предизвикани од монсуните, изјави официјален претставник, пренесува Би-би-си.
Ненадејните поплави убија повеќе од 300 лица во Пакистан и Кашмир, кој е под пакистанска администрација, во последните денови, а повеќето смртни случаи се регистрирани во планинската покраина Хајбер Пахтунхва.
Локален официјален претставник во најпогодениот округ Бунер изјави за Би-Би-Си дека најмалку 209 лица се водат како исчезнати таму, но се стравува дека бројот може да се зголеми.
Спасувачките екипи закопаа осум неидентификувани тела бидејќи немало пронајдени живи членови на семејството за да ги земат, изјави Џехангир Кан, портпарол на канцеларијата на заменик-комисарот на Бунер.
Некои роднини, исто така, не можат да ги земат телата на своите роднини бидејќи патиштата се сериозно оштетени, додаде тој.
Портпарол на покраинската спасувачка служба за новинската агенција АФП изјави дека „10 до 12 цели села“ се делумно закопани.
Монсунските дождови помеѓу јуни и септември обезбедуваат околу три четвртини од годишните врнежи од дожд во Јужна Азија.
Иако лизгањето на земјиштето и ненадејните поплави се вообичаени како резултат на тоа, научниците велат дека климатските промени ги прават овие временски настани поинтензивни и почести.
Д. Мишев
