Утрово е ограбена експозитурата на НЛБ Банка во општина Сарај, соопштија од банката. Како што се наведува во текстот, грабежот го извршила вооружена група додека во експозитурата имало клиенти и вработени.
Според соопштението од НЛБ во грабежот нема повредени:
Утрово во експозитурата на НЛБ Банка АД Скопје во општина Сарај се случи грабеж од страна на вооружена група разбојници. Во моментот на случувањата во експозитурата биле присутни вработени и клиенти, при што сите се безбедни и во добра состојба.
Претставници на Банката се во постојан контакт со клиентите и вработените кои биле присутни во филијалата, ставајќи ја нивната безбедност и нивното здравје во преден план.
Во моментов сѐ уште нема детали за висината на направената штета. Надлежните органи вршат увид на самото место и се во блиска соработка со Банката за што побрзо и ефикасно разрешување на случајот и разоткривање на деталите, за што јавноста ќе биде дополнително известена.
Средствата на клиентите се сигурни бидејќи Банката има осигурување на целиот свој имот и средства – стои во соопштението.
Пред три месеци од истата банка во Чаир се украдени 150 илјади евра. Досега не се пронајдени разбојниците.
