Нова ера со стари лица или ист производ со поминат рок. Неинвентивни слогани на граница меѓу комично и морбидно и по некој залепен фецес. Ова е сликата од првиот ден од предизборната кампања за локалните избори закажани за 15 октомври.
„Отворена и услужна општина за сите“ повеќе личи на парола од некој нискобуџетен филм за возрасни, отколку за серизона политичка кампања. Да се запраша човек дали некој намерно си тера мајтап, смислувајќи ги овие слогани, или едноставно толкав им е капацитетот?
„Живот во Бутел, за сите…“. Сигурно? Баш за сите? Знам дека на бутелчани воопшто не им е смешно, имајќи ја предвид нивната перцепција за општината во која тие живеат и тоа единствено е важно, бидејќи, на крајот на денот, тие го даваат својот глас за иднината на својата општина. Од друга страна, кога ќе земеме предвид дека неретко како гласачи се јавуваат и починати лица, па зошто да не веруваме дека навистина во Бутел има живот за сите?
„Здравјето на граѓаните во следниот четиригодишен мандат ќе биде приоритет“… И здравјето почнавте на мандати да го делите?
„Коце Шилегов“ ја започна својата кампања, ни помалку ни повеќе, на велосипед. Едниот од едната, другиот од другата страна на градот. Во очекување сме на конечниот слет и пресретнување некаде во центарот на градот и на една фер и демократска борба, како вистински витези, херои на градот!
Од понудените дебати на синоќешниот реперотар, главната вест е дека Марија Џонс не била нашминкана. Ете, зошто не заслужуваме повеќе.
Штабот на СДСМ во Аеродром бил измачкан со измет. Инвентивно, нема што!
Карпош секогаш е чекор напред, па овој пат ќе им овозможи повеќе пари на граѓаните! „На семејните буџети на граѓаните на Карпош им заштедуваме пари преку картичката ‘Мој Карпош’. Оваа картичка ќе понуди попусти за користење на услуги во одредени локали, угостителски објекти, ресторани, кина, библиотеки и други установи во општината“. Ѕинго да им позавиди на карпошани! Лајонес се слушаме?
Охрид и Битола се освоени, легендарното „15-септември“, совршено се вклопува во актуелното извикување за 15 октомври. А и набројоувањата во стилот на Влатко Ѓорчев, се веќе видена приказна… Истиот производ, во ново пакување, со поминат рок.
Не паничете, навалете се удобно и со широка насмевка пречекајте ја „Новата ера“, на обновени канализациски и водоводни мрежи кои ве оставаат без вода барем четири пати неделно, патишта кои тоа не се и не водат никаде, чист воздух, ама по задутре, и секако, решението на најголемото прашање од животна важност во Македонија, кој е поголем патриот: кокошката или јајцето?
Маја Ивановска
